Curfew sa mga minor estriktohon sa siyudad sa Lapu-Lapu
CEBU, Philippines — Gimando karon ni Lapu-Lapu City Police Director Police Colonel Elmer Lim ang estriktong pagpatuman sa curfew sa mga minor.
Kini ilabi na sa pagahimoong kalingawan sa pagsaulog sa piyesta sa kapilya sa sitio o mga barangay sa dakbayan.
Ang tigpamaba sa LCPO nga si Police Lieutenant Colonel Christian Torres mipahibawo sa mga tigbalita nga himoon ang estriktong pagpatuman sa curfew aron malikay ang mga minor de edad nga malambigit sa kagubot o mahimong biktima sa mahitabong kagubot.
Dugang pa ni Torres nga tinguha nila nga malikayan ug dili na masubli pa ang nahitabo sa 18 anyos nga tinun-an sa Grade 11 nga namatay human gidunggab sa 16 anyos nga tinun-an sa Grade 10 sa Barangay Sta. Rosa sa Isla Olango niadtong Domingo, Pebrer0 11, 2024.
Ang biktima mao si John Paul Roland Maranga Dungog, 18 anyos nga nagpuyo sa nahisgutang dapit.
Ang pagpanunggab nahitabo atol sa gipahigayon nga disco sa sitio Mainit sa Barangay Sta. Rosa sa Isla sa Olango diin gigamit sa suspek ang usa ka icepick.
Nihimo pa og dugang imbestigasyon ang kapolisan kabahin sa maong insidente. — MEL BANAT NEWS
- Latest
