50-anyos nga Koreano nalumos

CEBU, Philippines — Usa ka 50-anyos nga Korean national ang nakalas human kini nalumos sa samtang naligo sa dagat sa Sitio Tongo, Barangay Basdiot, Moalboal alas-12 pasado niadtong adlaw nga Domingo.

Ang nalumos giila nga si Youngkil Gee, kasamtangan nga nagpuyo sa maong dapit.

Base sa imbestigasyon sa kapolisan, ang maong langyaw katapusan nga nakit-an alas-10 sa buntag sa front desk  sa resort nga gidayunan niini kay niabiso nga lugwayan pa niya ang pagpuyo sa giabangang lawak.

Mga alas dose kwarentay sa hapon usa ka mananagat sa maong dapit ang nakakita sa biktima nga naglutaw sa kadagatan.

Nagtuo pa kini nga nag snorkeling lang apan nabantayan niya nga murag wala na kini naglihok, hinungdan nagpakitabang kini sa laing langyaw nga naligo sa maong dapit sa pagdala kaniya sa baybayon.

Ang  Gee dali nga gidala sa tambalanan Badian District Hospital apan gideklarar kini nga dead on arrival.

Ang patay nga lawas gidala na kini sa usa sa mga punerarya sa lungsod sa Ronda, samtang ang kapulisan sa Moalboal padayon nagpalalom sa ilang imbestigasyon sa maong insidente ug nakig-alayon usab sila sa Korean Consul para sa pagpahibalo sa mga kabanay niini didto sa ilang nasud. (BANAT NEWS)