Science lab sa Tubod National School nakadawat og donation

CEBU, Philippines — Sa tinguha nga mapaambit ang passion alang sa mga public school children ug panghinaot nga mas mapalambo ang dunay potensyal nga mahimong scientest usa ka Minglanilahanon nga nakabase sa United States nitabang aron mapalambo ang science laboratory nga mahimong ma access sa mga science enthusiast sa lungsod.

Si Lecar Marie Maghanoy, graduate sa Cebu Normal University sa major nga Biological Science upat ka tuig na nga nagtudlo sa Thornton High School ubos sa Jefferson Union High School District sa California, USA isip cultural exchange participants ug usa sab siya ka instructional coach.

Nagpadala kini og mga ekipo sa Tubod National School sama sa tulo ka electronic microscopes nga dunay ready-made slides, test tube holders, wire gauze, stop watches, alcohol lamps, lens cleaning papers ug nagkalain-laing klase sa litmus papers ug uban pa alang sa science laboratory.

Si Charlie Gerasmio, principal sa Tubod National High School midawat sa mga ekipo uban ang pipila ka mga tinun-an nga nalipay sa ilang nadawat aron maka establisar og science laboratory sa tunghaan.

Consistent donor si Maghanoy sa maong tunghaan nga nag promote sa culture ug tradition pinaagi sa school fiestas, intramurals, premyo sa mga kompetesiyon sa eskwelahan ug ubang kalihukan nga makatabang sa holistic development sa kabataan.

Naghatag sab kini og suporta sa mga atleta sa tunghaan aron makatabang sa pagdevelop sa grassroots sports activities pinaagi sa iyang kontribusyon atol sa municipal meet, volleyball leagues ug uban pa.

Gawas sa pagbutang og science laboratory sa mga bata, si Maghanoy nga miyembro sa iladong National Science Teachers Association sa US ug awarded Educator of the Year sa iyang school district nagplano sab nga tabangan ang Minglanilla's public school pinaagi sa pagpadala og computers ug printers alang sa libreng printing services. — MEL BANAT NEWS