Nalambigit sa pagpamaligya og ilegal nga armas sikop sa buy-bust
CEBU, Philippines — Nasikop atol sa gipahigayong buy-bust operation sa Criminal Investigation and Detection Group (CIDG) Cebu City Field Unit ang usa 21-anyos nga lalaki diha sa Sitio Tanguile, Barangay Busay, Dakbayan sa Sugbo niadtong Huwebes sa gabii.
Ang suspetsado mao si Adrian Erro alyas “Adi”, residente sa Sitio Sambag II, Barangay Guadalupe apan nag-abang og kwarto diha sa Sitio Tanguile.
Nasayran sa kapolisan nga si Erro nalambigit sa pagprenda ug pagpamaligya og dili lisensiyadong armas.
Giingong ang suspetsado nalambigit usab kini sa pipila ka mga robbery incident kinsa ang mga biktima mga menor de edad diha sa Barangay Busay.
Nasayran usab nga niadtong Huwebes ibaligya sa suspetsado ang iyahang armas hinungdan nga ang confidential informant sa CIDG Cebu City Field Unit nakigtransaksiyon nga kunohay sure buyer.
Nauyonan nga mag-meet-up ang mopalit kunohay og usa ka calibre .45 nga pistola sa kantidad nga P7,500 hinungdan nga nasikop ang suspetsado.
Nasakmit sa kapolisan gikan sa suspetsdo ang duha ka calibre .45 nga pistola, usa ka magazine sa kalibre .45, bala ug uban pa.
Gikatakdang pasakaan og kasong illegal possession of firearms ang suspetsado. BDB BANAT NEWS
- Latest
