Pag-demolish sa barko nga nasangad gipahunong ni Chan

CEBU, Philippines — Si Lapu-Lapu City Mayor Junard “Ahong” Chan niluwat og cease and desist order sa temporaryong pagpahunong sa pag-demolish sa M/V Diamond Highway nga barko nga nasangad diha sa Barangay Punta Engaño niadtong Miyerkules.

Si Mark Estrado, konsehal sa Barangay Punta Engaño niduso sa ilang barangay resolution kabahin sa mga reklamo sa shipbreaking operations nga kinahanglang hunongon dayon tungod kay nakaepekto kini sa kalikupan ug panglawas.

Kini human nga ang pipila ka mga residente sa maong dapit ang nakasinati og pagpangatol sa panit tungod sa abog gikan sa pag-demolish sa barko.

Matud ni Chan nga ang kompaniya sa barko maoy responsable sa pagpatambal sa mga nasakit.

Gipasusi ni Chan sa City Health Office (CHO) nga gipangulohan ni Agnes Cecile Realiza ug ni Pascual Dente, inspector sa City Environment and Natural Resources Office (CENRO) ang lugar diin nahimutang ang barko. Ang nahisgutang barko nasangad kini niadtong Disyembre 2021 atol sa bagyong Odette ug nasunog niadtong Abril 2023.

“It got burned so there are other materials, aside from the steel, like foam nga nadugmok, unya mapadpad sa hangin mao na atong ipa-vacuum ni nila starting today, as they will receive the recommendation from our office” matud ni Chan.

“Dili gyud moingon mohunong, more on clearing and cleaning of debris lang ang ilang buhaton, but no cutting for two weeks”, dugang ni Chan.

Si Bell Chua sa CENRO nagkanayon nga ang ship-breaking permit giisyu sa Maritime Industry Authority (MARINA).

Si Estrado nagpasalamat sa opisyales sa siyudad tungod sa paghatag og aksyon sa reklamo sa mga residente kabahin sa abog nga naggikan sa barko. (BANAT NEWS)