Kawatan og bisekleta nasikop sa Talisay
CEBU, Philippines — Nadakpan ang usa ka lalaki nga gitudlo nga maoy nikawat sa bisekleta sud sa usa ka subdivision sa Barangay Pooc, Dakbayan sa Talisay niadtong Lunes sa gabii.
Una niini, usa ka Leslie Panuncilio Flores, 44 anyos nga nagpuyo sa nahisgutang lugar ang mitawag og pakitabang sa kapolisan human siya nakadiskubre sa pagkahanaw sa usa ka road bike nga nikantidad og P40mil ka pesos ug usa ka bicycle helmet nga tag P1,500.
Sa dihang gisusi ang kuha sa CCTV, nahibaw-an nga gihimo sa suspek ang pagkawat mga alas 3:14 sa kadlawon.
Si Police Lt. Col. Wayne Magbanua, hepe sa kapolisan nitataw nga gitubag dayon sa operatiba ang taho.
Tuod man ilang nadakpan ang suspek ug nailhan nga si Alverto Bonito Deriada alyas Berto, 28 anyos nga nagpuyo sa sitio Cabotoy, Barangay Pooc sa nahisgutang siyudad.
Sa pagdakop sa suspek ilang narekuber ang usa ka bicycle helmet, duha ka mountain bike, duha ka resibo sa pawnshop sa pagprenda sa duha ka mountain bike, usa ka resibo sa pawnshop sa pagprenda sa usa ka cellphone ug laing resibo sa pawnshop sa pagprenda sa mountain bike.
Nagkanayon si Magbanua nga bisan paman sa gidaghanon sa kinawat sa suspek naila kini nga bag-o pa lang sa modus nga pagpangawat.
Gitanggong na sa bilangguan ang suspetsado nga gikatakdang pasakaan og kaso. MEL BANAT NEWS
- Latest
