Ginikanan sa minors nga ma-rescue sa curfew posibleng kasohan

CEBU, Philippines — Mohimo og pakisusi ang kapolisan sa Lapu-Lapu City Police (LCPO) sa ilang natala nga mga pangalan sa na-rescue nga mga minor de edad nga nakalapas sa curfew ordinance sa lokal nga kagamhanan.

Tumong niini aron masuta kun si kinsa ang nagbalik balik na nga mga pangan sa ilang na rescue alang sa posibleng pagpasaka og kaso batok sa mga ginikanan sa mga menor de edad.

Suma pa ni Police Lieutenant Christian Torres, pangulo sa City Investigation Detection and Management Unit (CIDMU) ug tigpamaba sa Lapu-Lapu City Police Office (LCPO) nga maisip na nga nagpabaya ang mga ginikanan kun kanunay na lang nga madakpan sa curfew ang ilang mga anak.

Sa pagkakaron ang gihimo sa kapolisan mao ang paghatud sa mga minors nga madakpan sa curfew ngadto sa ilang pinuy-anan ug ipatawag ang mga ginikanan aron pahinumduman sa ilang responsibilidad sa ilang mga anak nga menor de edad.

Taliwa niining gihimo sa kapolisan nasuta nga daghan lang gihapon ang kabataan nga ilang ma rescue nga naglaroy laroy bisan og lawom na ang kagabhion.

Pipila niini naa mangatulog sa mga publikong lugar sama na lang sa nag viral sa social media nga mga batan-on nga natulog sa welcome signage sa Mactan Economic Zone 1.

Nakita sa maong nag viral nga video ang gihimo sa mga kawani sa Lapu-Lapu city Hall nga nagdala og silhig ug gibunalbunalan ang gihigdaang karton nga mipahawa sa nangatulog nga mga bata. 

Ang maong insidente gikasagmuyo ni Lapu-Lapu City mayor Junard "Ahong" Chan ug gibalhin og laing buhatan ang maong mga kawani. (BANAT NEWS)