Duha ka kawani sa City Clearing Team positibo sa drug test

CEBU, Philippines — Nagpositibo sa paggamit sa ilegal nga drugas ang duha ka sakop sa City Clearing Team sa city hall  sa Siyudad sa Lapu-Lapu atol sa surprise drug test nga gipahigayon sa City of Lapu-Lapu Office for Substance Abuse Prevention (CLOSAP)  niadtong Miyerkules.

Ang duha kabahin sa 26 ka sakop sa City Clearing Team nga gipatawag ni Mayor Junard "Ahong" Chan alang sa tigom.

Sa maong panagtigom gimandoan dayon ni Chan ang CLOSAP sa pagpahigayon og surprise drug test ngadto kanila ug sa nigawas nga resulta duha niini ang nagpositibo.

Matud ni Chan nga iyang giluwatan ang marching order sa CLOSAP  sa pagpahigayon og surprise drug test  sa tanang kawani  sa kagamhanan  sa maong siyudad.

Si Garry Lao, executive director  sa CLOSAP nagkanayon nga ang gihimo ni Chan  alang kini sa pagsiguro nga luwas ang tanang kawani sa city hall  sa kalambigitan sa paggamit sa ilegal nga drugas. Dugang ni Lao nga daghan pa sa mga kawani sa kagamhanan sa Siyudad sa Lapu-Lapu ang ipaubos sa mandatory ug surprise drug test sa mosunod nga mga adlaw.  BDB BANAT NEWS