Tibuok kinabuhi nga nagpasalamat sa Balaang Bata

CEBU, Philippines — Nagkalainlain ang katuyoan sa mga deboto ni Senior Sto. Niño sa ilang pagsaksi sa fluvial procession 2024 nga nanukad sa Naval Forces Central (NAFORCEN) command sa Barangay Looc  sa Siyudad sa Lapu-Lapu. Si  Inoceta Torilio,  65, lumad nga taga Loay sa lalawigan sa Bohol bisan kUn nagsungkod na sa iyang gimulo nga arthritis, mituyo gayod pag-anhi sa Siyudad  sa Sugbo sa pagtuman sa iyang  tinuig nga panaad nga mosaksi gayod sa tinuig nga fluvial procession

Matud niya nga kaniadto, mga higala ang iyang kauban sa pag-adto sa Ouano Wharf sa Barangay Looc, Siyudad sa Mandaue sa pagsaksi  sa fluvial procession.

Dalaga pa siya ug nagtungha sa kolehiyo ug nagkuha og kursong Bachelor of Science in Elementary Education (BSEED) sa usa sa mga unibesidad dinhi sa Siyudad sa Sugbo dihang nagsugod siya sa pagdeboto sa Balaang Bata.

Iyang gipangayo kaniadto nga mopasar siya board exam kay ambisyon niyang mahimong magtutudlo ug wala siya pakyasa sa Balaang Bata,  gihatagan kini og katumanan hangtod na sa iyang pagretiro.

Dugang pa niya karon kuyog na niya ang iyang mga anak ug mga apo nga misayo gihapon aron makasaksi ug makapasalamat subay sa iyang panaad.

Sagrada Famila

Mao sab kini ang unang higayon nga ang tibuok Sagrada Familia nag-uban nga silang Senyor San Jose, Our Lady of Guadalupe ug Senyor Santo Niño.

Matud pa sa mga magtutuo mas maayo kuyog gayud sila kay usa man gayud sila kabanay. Sumala pa ni Gina Maniego, usa sa mga nisaksi makapanglimbawot balahibo ang pagsud-ong sa Sagrada Familia, kinsa nagpakita sa tema sa Kapistahan sa Balaan nga Bata Magnet of Love.

Uban sa iyang pamilya, sila nanghinaut nga sa sunod nga tuig, susama gihapon nga talan-awon ilang makita.

Pipila sa mga nisaksi sa Fluvial Procession maampoon nga malakip na matag tuig ang sagrada familia ug padayon ang kahiusahan sa mga sugbuanon. – Rowena D. Capistrano (BANAT NEWS)