Niyabo’g basura sa dagat gikasohan

CEBU, Philippines — Gipasakaan na og kaso sa Cebu City Environment and Natural Resources Office (CCENRO) niadtong adlaw nga Martes kadtong lalaking nakuhaan og video ug nag-viral sa social media nga niyabo og basura ngadto sa dagat diha sa Barangay Suba niadtong nakalabay nga bulan sa Disyembre.

Ang paglabay sa basura nakuhaan og video sa usa ka pasahero sa passenger motor banca  padung sa Bohol. Miani kini og daghang negatibong komento og pagsaway sa maong lalaki gikan sa mga netizens.

Ang maong pasahero miingon sa iyang post nga unang higayon pa niyang nisuway og motor banca padung sa Bohol ug mao pa gyud kadto iyang nasaksihan nga dunay naglabay og basura sa dagat.

Si Reymarr Hijara, ang officer –in-charge sa CCENRO maoy mibarog isip reklamante batok sa maong residente sa Suba tungod sa paglapas niini sa Republic Act. 9003 (Ecological Solid Waste Management Act of          2000).

Ang gikasohan mao si Henry Manayaga residente sa Block 3, Missionary Sto. Niño, Suba.

Ang kaso giduso na ngadto sa Office of the City Prosecutor-Cebu City Officer-in-charge Maria Luisa Ratilla.

“In behalf of the CCENRO and the Cebu City Government, I am formally filing a criminal complaint for Violation of Violation of Section 48 (1) of Republic Act.No.9003 against Henry Manayaga,” matud pa sa reklamo.

Gipasubot sa CCENRO sa kaso ang affidavit nga gihimo sa City Environmental Sanitation and Enforcement Team deputized officer.

Sa pasangil batok ka Manayaga giingong nakuhaan kini sa video samtang naglabog og basura ngadto sa dagat alas- 10:30 sa buntag niadtong Disyembre 31, 2024.

Giisyuhan siya og citation ticket diin siya gimandoan pagmulta og P1,000 o ba kaha mag community service siya sud sa pito ka adlaw o usa ka semana.

Apan gikataho nga wala magtagad sa sa iyang multa ug wala sab mopatim-aw si Manayaga aron mag-community service hangtud nga nakadesider ang CCENRO nga isang-at ang kaso ngadto sa piskalya.

Si Hijara nagkanayon nga, magsilbi unta kining leksyon sa tanan ilabi na kadtong mga nagpuyo sa kabaybayonan nga dili himuong basurahan ang dagat o ang paglabay og basura bisan asa.

Mipasidaan si Hijara nga seryoso ang siyudad nga gukdon kadtong mga masakpang malapason ilabi na kadtong pataka og labay og basura o kadtong dili mobahig sa ilang basura. —The Freeman