PCG: 204 sakyanan sa dagat ang mosalmot sa Fluvial Procession
CEBU, Philippines — Dunay 204 ka mga nagkalain-laing sakyanan sa dagat ang mosalmot a Fluvial Procession ugmang adlawa, Sabado, nga usa sa mga highlights sa kapistahan sa Balaang Batang si Sr. Sto. Niño sa adlaw nga Domingo.
Sumala pa sa Philippine Coast Guard (PCG) sa 204 ka mga nagparehistro ang 139 niini mga motorbanca, 31 ang merchant vessels, upat ang speedboats, 24 ang tugboats ug unom ka yati.
Si Commander Mark ,Larsen Mariano, Deputy Commander sa Coast Guard District Central Visayas miingon nga alas-3 sa kaadlawon hantod sa alas 9 sa buntag sa adlaw'ng Sabado sirad-an ang Mactan Channel sa maritime traffic.
Ang fluvial procession magsugod sa alas 6 sa buntag ug matapos sa alas 8 sa buntag, duha ka oras ang gigahin alang sa maong kalihukan.
Adto kini manukad sa Captain Veloso Pier sa Naval Forces Central sa Dakbayan sa Lapu-Lapu ug modunggo sa Pier 1 sa Cebu City.
Ang fluvial procession karong tuiga kay lahi usab sanglit sa labing unang higayon apil sa kalihukan ang Sagrada Familia. (BANAT NEWS)
- Latest
