Dry run sa traslacion ug fluvial procession gipahigayon kagahapon

CEBU, Philippines — Gipahigayon kagahapon ang dry run sa traslacion ug fluvial procession sa imahen ni Señor Santo Niño, Birhen sa Guadalupe diha ug St. Joseph diha sa National Shrine of St. Joseph sa Dakbayan sa Mandaue aron masuta kong makuha ang target travel time ug sa angayang pang palambuon sa kalihokan.

Mga alas 7:56 sa buntag kagahapon gisugdan ang dry run sa traslacion sa mga imahen diin nigikan kini sa Basilica Minore del Sto. Niño nga gipangulohan sa mga kaparian nga Agustino.

Gisubay ang rota sa MJ Cuenco Avenue, agi sa Imus Road lahos sa Barangay Hipodromo paingon sa Barangay Mabolo hangtud sa boundary sa Cebu City ug Mandaue City sa Barangay Subangdaku.  Nisugat ang mga tinugyanan sa baload hangtud na sa Barangay Mantuyong ngadto sa Barangay Sentro diin nahimutang ang National Shrine of St. Joseph.

Gikan sa National Shrine of St. Joseph nilahos ang convoy sa Dakbayan sa Lapu-Lapu agi sa  Mandaue-Mactan Bridge paingon sa Birhen sa Regla nga simbahan una nilahos sa Naval Forces Central (NAVFORCEN) alang sa fluvial procession.

Nakaangkorahe na ang passenger cargo vessel nga magsilbing galleon sa imahen sa Sagrada Familia diin kini ang labing unang higayon nga ubanon ang imahen ni St. Joseph. Pasado alas 9:00 sa buntag gisugdan ang dry run sa fluvial procession diin nisubay kini sa Mactan Channel, niagi sa Mandaue-Mactan Bridge, ngadto sa Ouano Wharf, deretso sa Cebu-Cordova Link Expressway dayon liko paingon sa Pier 1 diin didto kini modunggo.

Hugot nga seguridad ang gipatuman sa sea assets sa Philippine Coast Guard ug Philippine Navy aron masiguro nga hapsay ug luwas ang papahigayon sa kalihokan.

Gipaniguro sa Philippine Coast Guard ug Philippine Navy nga dili gyud makalusot ang mga dili rehistrado nga mga sakayan ug pangdakpon kadtong mosalmot nga walay permit.  Buot masiguro sa mga nagpasiugda sa 459th Fiesta Señor nga han-ay ang tanan ug makab-ot ang duh aka oras nga travel time sa fluvial procession. Samtang si Father John Ion Miranda, tigpamaba sa Basilica Minore del Sto. Niño nagkanayon nga andam na ang tanang umaabot nga kalihokan sa Fiesta Señor.

Ang M/V Martin 8 nga nagsilbing galleon karong tuiga gipanag-iya kini sa Maayo Shipping. Subay niini, si Commander Mark Larsen Mariano, deputy commander sa Coast Guard District Central Visayas nibutyag nga183 na ang mga nakapalista nga sakyanang pandagat nga moapil sa fluvial rrocession. — Rowena D. Capistrano, Romeo T. Limpangog (BANAT NEWS)