21 ka tawo nga nag-atubang og kaso nasikop sa LCPO

CEBU, Philippines —  Nadakpan sa kapolisan sa Lapu-Lapu City Police Office (LCPO) ang 21 ka mga tawo nga nag-atubang og mga kaso sa korte.

Si Police Lieutenant Colonel Christian Torres, pangulo sa City Investigation Detection and Management Unit (CIDMU) ug tigpamaba sa LCPO miingon nga nalakip sa mga nadakpan ang tulo ka mga Most Wanted Person (MWP) nga nag-atubang og kaso nga frustrated murder, illegal drug ug kalapasan sa pagpanamastamas og minor.

Samtang 18 nga mga Ordinary Wanted Person (OWP) nga mga nag-atubang kini og gagmay nga kaso nga naglakip sa illegal nga sugal ug uban pa nga ang korte mihatag kanila og kahigayonan sa pagpiyansa alang sa temporaryo niining kagawasan.

Si Torres miingon nga ilang gihingusgan ang paghipos sa mga wanted isip paagi sa pagpakgang sa mahitabong krimen.

Kini nonot sa pagbantay sa seguridad ilabi na sa kalihokan sa traslacion sa Imahen ni Senior Sto. Nino, prosesyon ug Sinulog Festival sa Siyudad sa Sugbo. — MEL (BANATNEWS)