Nangumot og dughan gidakop

CEBU , Philippines — Gidakop sa mga tanod sa Barangay Apas, siyudad sa Sugbo ang giingong usa ka hubog nga lalake human matud pa nangumot og dughan sa usa ka babaye nga call center agent kaadlawon sa Enero 12, 2024, Biyernes sa Omega Street, Barangay Apas.

Base sa Facebook post sa Barangay Apas – Office of the Barangay Captain ang biktima nga nagpuyo sa maong lugar padulong na matod pa mouli.

Naagian niini ang suspek nga giingong taga Barangay Sambag 1 ning siyudad ug nangutana asa makapalit og burger ug kalit lang dayon kini nangumot sa dughan sa biktima.

Matud ni Alfie Naingue, staff sa Gender and Development sa Barangay Apas nga nakasyagit ang biktima ug natunong sab nga dunay mga Barangay Tanod nga nag-roving adtong higayona nakapangayo kini og tabang ug nadakpan dayon ang maong lalake nga giingong nangumot og dughan.

Ang Women and Children’s Protection Desk sa Barangay daling niatiman sa biktima.

Kahinumduman nga duna say insidente sa miaging tuig diha sa dalan Urgello nga nangutana sab ug kalit lang nangumot og dughan.

Kini maoy rason ang Abellana Police Station nakig-alayon sa Barangay Apas aron pagsuta kun ang tawo nga gidakop kay mao ba sab ang nangumot og dughan sa miaging tuig.--Decemay P. Padilla/IBM

Wa ka ‘remit’ gipatay

Patay diha-diha dayon ang usa lalaki human kini gipusil sa nagpakaaron- ingnon nga water inspector diha sa ilahang balay sa Sitio Sawsawan, Barangay San Roque, Dakbayan sa Talisay niadtong Huwebes sa buntag.

Ang biktima mao si Rhamson Lariosa, 31, laborer nga nagpuyo sa maong dapit. Sa inisyal nga imbestigasyon sa kapolisan nasuta nga naa lang sa ilahang panimay ang biktima.

Naabot ang usa ka lalaki nga nagsul-ob og brown stripe t-shirt, maong pants ug itom nga facemask nga nagpaila nga water inspector kay inspeksyonon niya ang linya sa tubig sa gripo sa balay sa biktima.

Nitug-an si Liza Lariosa, inahan sa biktima nihangyo ang mamumuno nga mosusi sa koneksyon sa ilang tubig ug nagpatudlo kung asa ilahang meter.

Gikuyogan sab sa biktima ang mamumuno apan sa iyang pagtalikod nibunot og armas ang naulahi dayon pusil sa luyong bahin sa ulo sa biktima.

Nisibat ang gunman ug gibiyaan ang biktima nga nagkadugo nga nahagba sa yuta ug nakabsan kini dayon sa kinabuhi.

Nasayran nga natanggong na kaniadto ang biktima gumikan sa kalambigitan sa ilegal nga drugas.

Ang inahan sa biktima niangkon sa kapolisan nga nalambigit sa ilegal nga drugas ang iyang anak.

Matud pa niya namaligya kini og ginadiling drugas ug nakadungog siya nga nakadispalko kini sa kita sa ilegal nga drugas. Ang kapolisan padayon pa sa ilang imbestigasyon bahin sa maong hitabo ug ang pagsusi sa impormasyong gibutyag sa inahan niini bahin sa kalambigitan sa anak sa ilegal nga drugas.