Mga tulisan nitalaw sa burglar alarm'

CEBU, Philippines — Duha ka mga lalake nga nanagtaptap sa nawong ang misuway og tulis sa usa ka pawnshop diha sa Barangay Poblacion sa Lungsod sa Liloan pasado alas-3 sa hapon sa adlaw’ng Miyerkules, Enero 10, 2024.

Base sa imbestigasyon sa Liloan Police Station, ang duha ka tulisan sakay  og  NMax nga motor nga kolor itom ug puwa, mihunong sa atubangan nga bahin sa pawnshop ug misulod.

Makita sa CCTV footage nga ang mga tulisan nagsuot og bonnet, ang usa dakuon ang barog naka long sleeve nga maoy nagdala og armas samtang ang usa kay naka t-shirt og itom.

Apan wala molampos ang duha kay alerto ang mga empleyado sa pawnshop daling nakapindot sa alarm dihang nakabantay nga tulisan ang nisulod sa ilang establisamento.

Gumikan sa pagpindot sa alarma, naratol ang mga tulisan ug sa kasuko sa nagdala og armas, gipusil niini ang mga tellers maayo nalang gani wala’y naigo. Sigon ni Police Major Eric Gingoyon, hepe sa Liloan Police Station nga human mapakyas ang mga tulisan sa ilang tumong dali silang miikyas. Gitan-aw na karon sa kapulisan kung taga asa ang maong mga tulisan apan nabantayan nila nga ang ilang giigo nga establisemento wala’y mga security guard.

“Mga financial establishments dapat naa gyud nay security guards,” sigon ni Gingoyon. Nag-backtracking na karon ang kapolisan sa mga CCTV ug asa gikan ug asa paingon ang mga tulisan.  Nakita sab nga gitabunan sa mga tulisan ang plaka sa ilang motor.

Sigon ni Gingoyon nga kada semana mobisita gyud sila sa mga financial institutions. Matud niya dapat gyud naay gwardiya nga magbantay.

Makig-alayon ang Liloan Police Station sa kapulisan sa dakbayan sa Mandaue sa pag-backtrack sa mga CCTV sanglit ang maong mga tulisan mao say gidudahang nitulis sa usa ka convenience store sa Mandaue City kagahapon sa kaadlawon. (BANAT NEWS)