Mas daghang container van ibutang sa Devotee City

CEBU, Philippines — Mas daghang deboto ang ma-accommodate na sa Cebu City tungod kay ang Devotee City aduna nay mas daghang container van kompara sa niaging tuig.

Kagahapon, si Konsehal Francis Esparis nagkanayon nga bag-o lang nahuman ang ilang coordination meeting sa ubang mga departamento aron maandam ang Devotee City.

Magsugod ang pagpangandam sa maong lugar karong Enero 16, 2024 diin ipangmontar usab ang 30 ka container van. Nasayran nga sa niaging tuig 20 lang ka container van nga maka-cater og 400 ka mga deboto ang gipangmontar.

Samtang karong tuiga, ang 30 ka container vans maka-akumodar og hangtud sa 500 ka deboto.

“Mao ni atong ibutang nga kasamtangang shelter para sa atong mga deboto nga moari sa atong Dakbayan sa Sugbo sa probinsya, syudad ug kalungsoran ug gani adunay pipila pa niini, base sa among observation nga duna pay manakay og barko aron moari diri”, matud ni Esparis. Si Esparis nagkanayon nga kadtong gusto nga mo-avail sa libreng accommodation kinahanglan lang nga magpakita sa ilang tagsa-tagsa ka tiket sa bus o sea vessel aron pagmatuod nga gikan sila sa ubang lungsod.

Ang Devotee City mahimutang sa daplin sa karsada atubangan sa Cebu City Central Post Office, Pigafetta Road ug ubos kini sa first-come, first-served basis.

“Ato sad kinahanglan nila, usa niini nga mo tahod sila sa atong house rules, no smoking, no liquors, no sharp objects or weapons, No I.D , No entry”, Padayag ni Esparis.

Matud ni Esparis nga manghatag sila og mga opisyal nga ID alang sa mga deboto nga magsilbing pass usab nila sa paggawas ug pagsulod sa Devotee City.

Dugang ni Esparis nga adunay magbantay nga kapolisan ug mga tanod sa lugar ug ang opisyal nga paglusad sa Devotee City karong Enero 19, 2024 diin sugdan kini sa usa ka Santos nga Misa ug magsugod usab ang pagparehistro sa samang adlaw. (BANAT NEWS)