Lalaki nga dili kahibawo molangoy nisawom sa swimming pool nalumos

CEBU, Philippines — Usa ka 20-anyos nga lalaki ang nalumos sa gikaligoan nga swimming pool sa usa ka pribadong resort diha sa Barangay Tan-awan, Lungsod sa Oslob, niadtong Sabado.

Ang biktima mao si Mark Revin Araza Sese, lumad nga taga Lebis, Caloocan, Manila.

Matud ni Police Chief Master Sergeant Randy Daga, imbestigador sa Oslob Police Station nga ang pamilya sa biktima ni check-in sa resort alas 6:00 sa gabii sa adlaw'ng Sabado.

Dihang naka-check-in na ang duha ka menor de edad nga kuyog sa pamilya nga nag-edad og 11 ug 12-anyos nihangyo kini nga mangaligo sa swimming pool apan nibalibad ang nagdumala sa resort tungod kay dili na pakaligoan ang pool kong lapas sa alas 6:00 sa gabii tungod kay wala nay life guard.

Apan giingong nipasalig ang pamilya nga maoy mobantay sa duha ka bata ug dihang nangaligo na ang mga bata ang unang nagbantay ang inahan sa biktima.

Gipulihan ni Sese ang iyang inahan sa pagbantay sa duha ka bata.

Pagkataod-taod naligo usab si Sese giingong nisawom kini sa 4ft padulong sa 7ft nga bahin sa swimming pool ug kalit lang kining nagkapa-kapa tungod kay dili diay kini kahibawo nga molangoy.

Wala nagtagad ang duha ka menor de edad tungod kay nagtuo nga nagbinuang ra ang biktima ug dihang gipangutana sila sa laing bata nga 15-anyos kong kahibawo ba molangay ang biktima nitando pod ang mga bata.

Matud usab ni Daga nga niingon ang 11-anyos nga bata nga nalumos ang biktima apan wala matubag sa pamilya tungod kay na-busy.

Ug pagtan-aw sa inahan sa biktima sa swimming pool nakit-an nalang niya ang iyang anak nga naa na sa ilawom wala mo ambak ang inahan ngadto sa swimming pool tungod kay dili usab kini kahibawo nga molangoy.

Gisuwayan sa 15-anyos nga bata sa pagtabang ang biktima apan dili niya madala ug wala sab sila nakapangayo og tabang sa resort.

Gipangita pa nila ang uyoan sa biktima ug maoy nisawom sa swimming pool aron pagkuha ni Sese.

Giingong pito ka minutos ang nakalabay una nahaw-as ang biktima gikan sa ilawom sa tubig ug gisuwayan nila kini og revive pinaagi sa CPR ug gidala sa Oslob District Hospital apan gideklara kini nga patay na nga naabot sa tambalanan. —/BDB (BANAT NEWS)