CCTO nipaila sa traffic scheme pagpalambo sa trapiko

CEBU, Philippines — Ang Cebu City Transportation Office (CCTO) nipaila sa traffic scheme nga nagtumong sa pagpalambot sa kahimtang sa trapiko diha sa Governor Cuenco Avenue ubos sa CO 2239.

Ang CCTO o ang Road Management Authority (RMA) nipagawas og advisory nga mopahigayon sila og “assisted or regulated left turn” sa tanang agianan sa mga business establishments ug residential areas aron mamentinar ang dagan sa trapiko diha sa nahisgutang lugar nga walay makompromiso sa economic viability. Ang maong advisory gipirmahan ni CCTO acting head, Raquel Arce diin gitumbok usab sa maong advisory nga sa alas 5:00 sa buntag karong adlawa ang tanang “No left turn signages” nga gibutang sa Gov. Cuenco corridor tangtangon na sa management.

Himuon kini sa kondisyon nga adunay usa ka marshal matag drayber ang modumala sa mga sakyanan nga moliko sa wala ug kinahanglan nga strategically assigned nga ibutang sa center line sa Gov. Cuenco Avenue atubangan sa partikular nga agianan.

Sa laing bahin, gikataho nga magpabilin si Cebu City Councilor Rey Gealon isip traffic czar sa siyudad diin dugang traffic plans ang gilatid aron matubag ang kahimtang sa trapiko sa siyudad.

Si Gealon nangayo karon og pagtugot sa konseho sa Dakbayan sa Sugbo aron paghangyo sa Metro Pacific Tollways Corporation (MPTC) o mga kompaniya nga susama og kahanas nga mohimo og feasibility study sa paggamit sa artificial intelligence (AI) sa pagdumala sa vehicular traffic sa Dakbayan sa Sugbo.

Gitumbok sa resolusyon ni Gealon nga ang MPTC isip labing haom nga agianan aron makahatag og kahamugaway sa katawhan pinaagi sa mga solusyon sa imprastraktura pinaagi sa mobility ug sustainable practices malungtarong mga gawi.

Matud usab ni Gealon nga ang pinakabag-ong crucial issue sa Dakbayan sa Sugbo nga kinahanglang sulbaron mao ang kahimtang sa trapiko.

Hinuon samtang nagpadayon ang mga paningkamot aron matubag ang maong butang, aduna pay mga paagi nga mahimong iimplementar alang sa kalamboan.

Ang AI mahimong magamit sa paghimo og mobile application nga magamit usab aron ma-access ang impormasyon sa transportasyon, ug usa ka centralized system alang sa pagkolekta sa pamasahe ug settlement tali sa public operators.

Gawas niini, ang AI mahimong magtugot alang sa efficient dispatch sa public transport samtang nagsuporta sa transport operators sa pagsunod sa modernizing program.

Si Gealon nagkanayon nga ang paggamit sa AI makatabang sa paglusad sa usa ka digital platform alang sa cashless payments ug variable message signage sa pag-access sa traffic information. — /BDB (BANAT NEWS)