Talisay mohatag og libreng snacks sa mga mo renew sa business permit

CEBU, Philippines — Libreng snacks ang gitanyag sa kagamhanan sa Dakbayan sa Talisay alang ngadto sa mga tawo nga mo renew ug magparehistro sa ilang negosyo.

Si Mary Jane Enrile, pangulo sa Business Permit and Licensing Office nipadayag nga ang paghatag og snacks ug kape sa ilang mga kliyente mao ang ilang paagi sa paghatag og pahalipay ug pagpasalamat kanila.

Ang Dakbayan sa Talisay nagpahigayon sa one-stop-shop sa business permit ug renewal sa mga negosyo.

Gihulagway ni Enrile nga nagkadaghan na usab ang nikuha sa ilang mga permit.

Matud ni Enrile nga gikan sa barangay clearance hangtud sa nagkalain-laing rekisitos mahimo ra nga makuha diha sa usa ka lugar sa Talisay City Hall sa ilang mga kliyente.

Matapos ang ilang one-stop-shop karong Enero 20 niining tuiga ug ang ilang paghatag og 20 porsyento nga discount sa pagbayad sa real property tax kutob kini karong adlawa.

Sa laing bahin, ang mga nanag-iya og balay patigayon dili na kinahanglang magpaabot og dugay aron makakuha og certificate of occupancy, kini maoy pasalig sa pangulo sa Office of the Building Official Architect Florante Catalan.

Matud ni Catalan tanang mga building owner makakuha ra sa ilang certificate of occupancy sa maong adlaw diin sila ni-process tungod sa mga simple nga pamaagi.

Si Catalan nagkanayon nga ang CO importante kaayo aron sa pagsiguro sa mga office o residence nga ang gitrabaho luwas alang sa pagpuyo ug nisunod sa National Building Code ug city ordinances.

Gibutyag ni Catalan nga dili magamit ang structure sa building bisan og nahuman na kini kon dili mokuha og certificate of occupancy diin kalapasan kong puy-an kini. Alang sa commercial building operators, aron sila mahatagan og business permit mag-apply sila tungod kay kong wala sila’y certificate of occupancy dili sila pwedeng mag- operate sa business.

Gipahimangnoan ni Catalan nga kadtong malapason mag-atubang kini og silot o multa. — BDB (BANATNEWS)