Imahen ni Santo Niño mobisita sa Talisay ugma

CEBU, Philippines —  Gikatakdang mobisita ugma sa Dakbayan sa Talisay ang imahen ni Señor Santo Niño.

Ang pagsuroy sa imahen tipik kini sa umaabot nga Pista Señor.

Ang buhatan sa City of Talisay-Traffic Operation Development Authority (CT-TODA)  nangandam niini aron paspas ug hapsay ang biyahe nga malakip sa rota imahen.

Sa alas 8:00 sa buntag ugma mogawas ang imahen gikan sa Basilica Minore del Santo Niño paingon sa Dakbayan Talisay gamit ang karsada sa Natalio Bacalso Avenue.

Inig sulod diha sa Barangay Bulacao, mo left turn kini diha sa karsada sa  Sitio Sangi, Barangay Tabunok hangtud nga mosubay sa karsada sa Barangay San Isidro.

Ang imahen mo right turn kini aron mosubay sa Cebu South Coastal Road ug mo right turn napod aron mosulod sa luyo nga gate sa Cebu South Memorial Medical Center.

Nasayran nga adunay ipahigayon nga misa ug pagkahuman dad-on na usab ang imahen diha sa Talisay City Jail sa Barangay Maghaway.

Mag-overnight ang imahen diha sa maong pasilidad ug sa alas 8:00 sa buntag sa adlaw nga Biyernes mopaingon kini ngadto sa Dakbayan sa Mandaue.

Sa dili pa kini mobiya sa Dakbayan sa Talisay mosubay ang imahen diha sa Talisay City Hall, mogawas kini sa Barangay Mohon ug subay sa mga barangay sa Dumlog, Poblacion, Cansojong, Tanke ug San Roque. Inig balik sa CSCR molahos-lahos na ang biyahe niini.

Gipahimangnoan daan sa CT-TODA ang mga motorista sa kalihokan aron kong mahimo nga malikayan ang rota mas labing maayo aron dili matanggong sa trapiko. BDB (BANATNEWS)