Hinabang sa mga nasunogan gitinguha nga ipaagi og voucher
CEBU, Philippines — Gitinguha karon sa kagamhanan sa siyudad sa Lapu-Lapu nga ipaagi na lang sa voucher ug dili na cash ang paghatag sa ayuda sa mga biktima sa sunog sa sitio Sta Maria, Barangay Pusok sa maong siyudad.
Si Lapu-Lapu City Mayor Junard "Ahong" Chan miingon nga ilang nahuna-hunaan ang maong paagi aron pagsiguro nga magamit gayod kini sa mga biktima sa pagpatukod og balik sa ilang mga panimalay ilabi na sa mga tag-iya niini.
Sa nasayran mokabat sa kapin sa 2,000 ka pamilya ang naapektuhan sa sunog niadtong Disyembre 12, 2023.
Niadtong miaging semana ang Department of Social Welfare and Development (DSWD) nakapahigayon na sa paghatag og cash assistance nga dul-an na sa P30 milyones.
Gipasabot ni Mayor Chan nga tungod kay daghan man ang naghatag og pinansiyal nga ayuda sila nabalaka nga magamit sa laing butang ang nadawat nga hinabang sa mga biktima sa sunog ug dili na hinoon makapatukod og balik sa ilang mga panimay.
Hinuon si Mayor Chan miingon nga wala pa nila masubay ang kinatibuk-ang kantidad sa cash donation ug iyang gipaniguro nga aduna kini tukmang pagkuwentada nga bukas ngadto sa publiko. (BANAT NEWS)
- Latest
