Pagsaulog sa Pasko malinawon, mga pabuto gibantayan
CEBU, Philippines — Mas gipahugtan karon sa Police Regional Office (PRO)-7 ang ilang pagbantay ilabi na sa pagsugat sa Bag-ong Tuig nonot sa posibleng insidente may kalabutan sa pabuto.
Gipanglantawan sa Police Regional Office ang posibilidad nga adunay mahitabong firecracker related incident hinungdan nga karon pa lang gipahugtan pa ang ilang monitoring aron masiguro nga luwas ang mga tawo.
Suma pa sa tigpamaba sa PRO-7 Police Lieutenant Gerard Ace Pelare nga gimanduan sa ilang Regional Director ang tanang Unit Commanders, Chiefs of Police, City Director, Provincial Director nga mosusi gyud sa firecrackers ug mopahimangno sa katawhan nga mag-amping ug dili mopalit sa dili accredited nga mga namaligya og firecrackers ug pyrotechniques.
Gibutyag sa PRO-7 nga malinawon ang pagsaulog sa Pasko karong tuiga sa Central Visayas diin wala’y natala nga mga dagkong panghitabo gawas lang sa mga aksidente sa kadalanan.
Sa ilang monitoring wala sila’y nadawat nga report nga dunay nabiktima sa saag nga bala hinoon makig-alayon pa sila sa Department of Health Central Visayas alang sa dugang impormasyon.
Ang DOH-7 wala pa hinoon mopagawas og data may kalabutan sa Christmas Related Incident. Kahinumduman una nang gibutyag sa mga opisyal sa panglawas nga tinguha nila ang zero incident sa firecrackers ug stray bullet karong tuiga.
Niadtong miaging tuig ang DOH-7 nakatala og 83 ka mga firecracker related injuries.
Samtang sa Eastern Visayas nakatala og usa ka firecracker related case atol sa panahon sa Pasko. MEL (BANATNEWS)
- Latest
