Orihinal nga rota sa prosesyon sa Fiesta Señor posibleng magpabilin

CEBU, Philippines — Ang pagpabilin sa orihinal nga rota sa prosisyon sa Fiesta Señor posible gihapon apan kinahanglan lang og sakto nga management tungod sa nagpadayong civil works sa Cebu Bus Rapid Transit (CBRT) matud ni Engineer Norving Imbong, CBRT manager.

Kagahapon si Imbong nagkanayon nga posible ang direktiba ni Cebu City Mayor Michael Rama nga ipabilin ang orihinal nga rota sa mga religious procession nga mao ang Walk with Jesus ug Walk with Mary apan nagkinahanglan og “careful management”.

“This can be possible but with the problem of the segregators that is restricting movement of the people and may cause harm especially in case of a stampede. A careful management of the crowd is necessary if that will be the decision to be the route”, matud p ni Imbong.

Kaniadto, gideklarar ni Rama nga walay kausaban sa rota sa mga religious procession sa Fiesta Señor bisan sa napagpadayong pagtrabaho sa CBRT.

“I don’t want changes of the route of the Walk for Jesus and Walk for Mary”, matud ni Rama sa mga tigbalita niadtong Nobiyembre 28, 2023.

Sa wala pa moluwat sa maong pamahayag si Rama, ang Basilica Minore del Santo Niño nipahibawo nga ang rota sa mga prosisyon nga mao ang Walk with Jesus ug Walk with Mary alang sa 2024 mas taas ug nausab ug dili na susama sa nangaging mga tuig nga naglakip og 400 metros nga rota. Ang maong mga kausaban tungod sa nagpadayong civil works sa CBRT subay sa Osmeña Boulevard.

Matud ni Rama nga kinahanglang mopatigbabaw ang iyang mga direktiba lakip na ang iyang panawagan nga paspasan ang pagtangtang sa duha ka skywalk sa Osmeña Boulevard nga maapektohan sa BRT project. Kalabot sa pagtangtang ug pagbalhin sa mga skywalk wala pa usab matino, si Imbong nagkanayon nga nakasumitir na sila og suwat ngadto kang Atty. Collin Rossel, city administrator niadtong Martes nga nangayo sa pinal nga posisyon sa city government kalabot sa maong skywalks. (BANAT NEWS)