Mga empleyado sa Kapitolyo makadawat og tag P40 mil nga bonus
CEBU, Philippines — Aprobado na sa Sangguniang Panlalawigan ang P81.7 milyones nga Supplemental Budget No. 2 atol sa regular session niini.
Lakip sa maong kantidad ang bonus sa mga empleyado sa Kapitolyo.
Ang maong supplemental budget gi-certify kini nga urgent ni Gobernador Gwendolyn Garcia hinungdan nga napasar kini hangtud sa third reading.
"What was approved today (Dec.18) was Supplemental Budget No.2. which allocated a budget for the Collective Negotiation Agreement (CNA) in the amount of P25,000 and the Service Recognition Incentive (SRI) of P15,000", matud ni Bokal Glenn Soco.
Sa maong supplemental budget ang 1,290 ka elected, appointed, permanent casual ug bisan mga co-terminus makadawat sa ilang Christmas bonus nga mokabat sa P40,000.
Samtang ang 2,010 ka job order employees makadawat tag P15,000 isip premium ug gratuity pay diin subay kini sa COA-DBM Joint Circular No. 2, s. 2020 nga giamendar sa JC No. 2, s. 2022 o ang AO No. 13 sa gratuity pay.
Sa laing bahin, si Mayor Jonas Cortes sa Dakbayan sa Mandaue nipahibawo niini ang paghatag og bonus ngadto sa mga magtutudlo sa mga pampublikong tunghaan sa siyudad.
Ang maong pagpahibawo atol kini sa gipahigayong tigom sa Mandaue City Local School Board sa niaging adlaw.
Matud ni Cortes nga nagpasalamat ang kagamhanan sa siyudad sa gipakitang kakugi ug gugma sa mga magtutudlo sa pagdesiplina ug paghatag og kahibawo sa matag tinun-an nga kabataan sa siyudad.
Gihisgotan usab niya ang mga infrastructure project ug mga request sa mga eskwelahan aron mahatag ang dekalidad nga edukasyon sa mga pampublikong tunghaan sa Dakbayan sa Mandaue.
Gidayeg ni Cortes ang pasidungog nga nadawat sa Mandaue City Central School isip mananaog sa Gawad Kalasag (national finalist top 2) best public teaching personnel elementary.
Apil usab nga gidayeg ni Cortes ang pasidungog nga nadawat sa mga teaching personnel ug mga tunghaan sa siyudad isip winners ug finalists sa 2023 Region 7 Award. — BDB (BANATNEWS)
- Latest
