Mga pasahero natanggong

CEBU, Philippines — Sobra usa ka libong pasahero ang nangatanggong sa mga pantalan tungod sa bagyong Kabayan matud pa sa tigpamaba sa Cebu Coast Guard Central Visayas nga si Commander Mark Larsen Mariano.

Matud pa ni Mariano, niabot ngadto sa 1,295 ka mga pasahero ang na stranded sa nagkalain-laing mga pantalan sa Central Visayas tungod sa maong bagyo.

Gawas sa mga pasahero, 200 ka mga rolling cargoes ug 34 ka mga barko ang wala tugoti nga makalarga tungod sa kadautan sa panahon.

Aduna usab dili mominos sa 53 ka mga barko ang nagpasilong sa mga nagkadaiyang pantalan. Ang CGS padayon niawhag sa mga gagmay nga mananagat nga dili mopugos og panagat ning panahona ug sa mga biyahidor nga dili mopugos sa paglawig sa dagat.

Hinuon sa post sa Cebu Ports Authority kagahapon pasado sa alas-5 sa hapon, gitugotan na ang pagbalik sa biyahe sa Ormoc ug Hilongos via Roble Shipping; Ozamis/ Iligan and Cagayan via Trans-Asia; Dipolog via Medallion Shipping; Surigao via Starlite. Cokaliong Shipping padung sa Ubay, Nasipit, Surigao, ug Iloilo; via Oceanjet sa Tagbilaran; ug  Liteferry padung sa Cagayan.

Samtang ang Mactan Cebu International Airport nipahibalo usab nga adunay mga biyahe kanselado tungod sa maong bagyo. Ang maong rota naglambigit sa Cebu ngadto na sa Siargao, Surigao ug Ozamiz.

Subay sa weather bulletin sa DOST-Pagasa alas-6 sa hapon Disyembre 18,2023, ang bagyong Kabayan nasigpatan sa Kabanglasan, Bukidnon. Gitambagan ang mga nagpuyo duol sa mga sapa, baybayon nga mohiklin una sa mas luwas nga lugar tungod sa masinating mga pagbunok sa uwan.

Sa pikas bahin, gidid-an una sa Dakbayan sa Talisay nga paagian ang Manipis Road padung sa Toledo City human dunay lima ka motorsiklo ang nangalamba sa maong dalan tungod sa kadangog niini dala aning pagsige og uwan.

Matud pa nagsubay sa karsada sa Toledo Wharf sa Barangay Campo 4 paingon sa Barangay Manipis, Dakbayan sa Talisay kagahapon kining lima ka mga motorsiklo nga nangalamba.

Ang City of Talisay-Traffic Operation Development Authority (CT-TODA) miawhag sa mga motorista nga likayan lang ang lugar sa pag agi.

Si Jonathan Tumulak, pangu sa CT-TODA nga delikado sab ang dapit sa landslide tungod kay basa ang yuta gumikan sa sige og pag-uwan.

Lakip sa nadisgrasya mao ang duha ka mga sakyanan hinuon wala ra kini magrabehi. Si Mayor Gerald Anthony “Samsam” Gullas nihangyo ngadto sa mga kadagkoan sa mga pribadong tunghaan sa dakbayan nga kanselahon lang una ang klase human ang Sugbo nalakip sa signal number 1 tungod sa bagyong Kabayan.

Ang pampublikong tunghaan ra ang ilang madali sa pagkanselar ang klase pinaagi sa koordinasyon sa Department of Education (DEPED) apan karon mas maayo nga iapil sab ang pribadong mga tunghaan aron luwas ang tanan nga mga estudyante.

Sa dugang kalamboan, gideklarar ni Mayor Cesar "Didoy" Suan, sa Lungsod sa Cordova gisuspenso ang tanang klase tungod sa bagyo aron masiguro ang kaluwasan sa mga tinun-an ug mga magtutudlo. (BANAT NEWS)