Minor kakunsabo pagpusil sa 15-anyos
CEBU, Philippines — Gikustodiya sa Mabolo Police Station sa Cebu City ang usa sa mga gitumbok nga suspek sa pagpusil sa usa ka 15-anyos nga batang lalake samtang ang naulahi nagduwa og kompyuter sa usa ka internet cafe diha sa Sitio Ponce 1, Barangyay Carreta, Siyudad sa Sugbo sa miaging gabii.
Nasayran nga duha ang gitumbok nga mipusil sa 15 anyos. Ang biktima kritikal ang kahimtang sa tambalanan tungod samad pinusilan nga iyang naangkon sa ulo atol ning pagsuwat sa balita.
Ang suspek nga gikostudiya sa kapolisan menor de edad apan ang giingong nagpusil sa biktima nga hamtong padayon pang gipangita.
Matud ni Police Lieutenant Colonel Janette Rafter, Deputy City Director for Operations sa Cebu City Police Office nga ang biktima nagduwa og computer sa internet cafe dihang ang gunman kinsa naa ra sab sulod sa internet cafe adtong higayona mipusil sa biktima.
Nakakuha og CCTV footage ang kapulisan sa nahitabong pagpamusil nga nakatabang sa pag-ila sa usa sa mga repsonsable sa krimen. Sa gihimong manhunt operation natultolan nila ang menor de edad nga kauban sa gunman.
Kaila ra matud pa ang biktima ug sa mga naghimo sa krimen ug usa sa gitan-aw nga motibo mao ang pagkalambigit sa illegal nga drugas.
“Accordingly naa pud tay impormasyon nga kani sila murag naay involvement sa illegal nga druga, usa ra ni ka compound then mao na naay personal conflict sa ilahang aktibidades nga dili maayo,” sigon ni Rafter. — IBM (BANATNEWS)
- Latest
