Modaghan pa ang ipakatap nga polis sa Misa de Gallo—PRO-7

CEBU, Philippines — Sa pagsugod sa Misa de Gallo karong Disyembre 16, 2023 sa kadlawon mas modaghan pa ang mga polis nga ipakatap sa mga simbahan ug ubang lugar nga dugokan og daghang tawo.

Matud ni Police Lieutenant Colonel Gerard Ace Pelare, tigpamaba sa Police Regional Office (PRO)-7 nga gawas sa police deployment mo-rely usab sila sa tabang sa mga religious sector ingon man sa mga manimbahay aron dili sila mabiktima sa mga krimen.

Naka-heigtened alert karon ang PRO-7 ug kasagaran ang regional director pinaagi sa assessment sa Regional Operations Division ug Regional Intelligence Division mohatag og update kong isaka ang alert status. Wala pay nadawat nga deklarasyon nga kapolisan nga idili ang back pack kon moadto sa mga simbahan ug ubang dapit nga adtuon sa mga tawo.

Nihangyo ang PRO-7 sa katawhan nga kon moadto og mga simbahan ug ubang lugar dili magdala og dakong kantidad sa kwarta.

“Kami sa polis magbutang mi og Police Assistance Desk sa tanang simbahan para naa moy kaduolan unya naa sad gyu’y police nga nagabantay two hours before the mass and an hour after the mass will culminate para naa gyuy police presence”, butyag ni Pelare.   Gihangop sa kapolisan ang ang mga security initiative sa mga lokal nga kagamhanan sa Central Visayas sama sa pagpatuman sa curfew aron malikayan ang pagtapok-tapok sa mga batan-on bisan og lawom na ang kagabhion nga moresulta na sa kagubot.

Nasayran nga sa pagkakaron anaa na sa 6,000 ka mga polis ang gipakatap sa tibuok rehiyon-7 nga nagbantay sa mga kalihokan subay na sa holiday season. (BANAT NEWS)