Nakolektang basura sa cleanup drive mikunhod

CEBU, Philippines — Mikunhod ang gidaghanon sa nakolektang basura sa bag-ohay lang natapos nga Cebu Citywide Clean-up Challenge sa nakalabay nga adlaw sumala pa sa mga nagpasiugda niini.

Atol sa koleksyon sa tanang nahipos nga basura gikan sa kabaybayonan ug sapa, 61.40 tonelada lang kini itandi sa 137 tonelada sa samang kalihokan sa miaging tuig sumala pa ni Reymarr Hijara,  officer-in-charge sa CENRO kinsa sakop sab sa Coast Board Management atol sa pakighinabi sa The Freeman, igsuong pamantalaan sa Banat News.

Ang daghang nakolektang basura gikan kini sa mga sapa sa siyudad nga niabot og 33.71 tonelada, samtang ang uban gikan sa mga barangay cleanup operation nga gisalmutan sa 5,925  ka volunteers.

Sama sa gihapon, kadaghanan sa mga volunteers mga kawani sa gobiyerno samtang pipila lang ang gikan sa private sector, civic groups ug NGOs.

“I believe migamay na siya karon kay sige man ta cleanup gud pud prior to the Citywide Cleanup,” matud pang Hijara.

Gihangyo ni Hijara ang publiko nga ipadayon kining kalamboan para sa limpyo ug haruhay sa palibot sa siyudad.

“Each day presents an opportunity to protect our natural spaces, reduce pollution, and promote a sustainable future for generations to come…Giawhag nato ang tanan nga ipadayon ang diwa sa pagpanglimpyo karon pinaagi sa pagpadayon sa mga sa husto nga paglainlain sa basura, pag-recycle, ug pag-menos sa atong paggamit sa mga plastik nga ka-usa ra gamiton. Atong awhagon ang atong pamilya, mga higala, ug mga silingan sa pag-apil kanamo niini nga kawsa,” puno pa niya. — sa The Freeman/IBM (BANAT NEWS)