Kaso sa HIV/AIDS sa Lapu-Lapu nikunhod karong tuiga

CEBU, Philippines — Nakatala ang Lapu-Lapu City Health Office og 69 ka kaso sa Human Immunodeficiency Virus/Acquired Immunodeficiency Syndrome (HIV/AIDS) sa unang walo ka bulan nga nagsugod sa buwan sa Enero hangtud sa Agosto niining tuiga.

Gikompirma kini ni Dr. Niel Victor Pajugot, medical Officer sa LLCHO

Apan matud ni Pajugot nga ilang nakita ang pagkunhod sa gidaghanon sa mga gitakboyan sa  maong matang sa balatian kon itandi sa tuig 2022  nga nakatala og 117 ka kaso  sa HIV/AIDS.

Si Pajugot nagkanayon nga ang pagkunhod sa kaso sa HIV/AIDS karong tuiga tungod usab kini sa gipatuman nila nga mga programa nga gitumong alang sa pagpakgang sa maong sakit.

Naglakip sa ilang mga programa mao ang ilang gipasiugdahan nga awareness campaigns, community outreach programs ug ingon man libre nga HIV testing.

Dugang ni Pajugot nga ilang gitugot usab ngadto sa mga Oponganon nga modangop ngadto kanila sa pagpangayog panabang sa pagdala sa testing kits sa ilang panimalay aron himoon nila ang pag-testing sa ilang kaugalingon apan kinahanglan nga ipahibalo ngadto City Health Office ang  resulta alang sa mga lakang nga himuon. (/BDB) (BANAT NEWS)