Ex-Barangay Kagawad sikop sa drug bust

CEBU, Philippines — Nadakpan sa mga operatiba sa Philippine Drug Enforcement Agency (PDEA)-7 ang usa ka kanhi konsehal sa Barangay Sto. Niño, sa siyudad sa Sugbo atol sa ilang buy-bust operation diha sa Bayanihan Village, Barangay Quiot ning siyudad.

Ang suspect mao si Brian Dwight Gaviola, 47, wala’y trabaho, residente sa Barangay Quiot, Cebu City nga naapil sa PDEA-PNP Regional Target List.

Si Gaviola nakuhaan og lima ka putos sa gituohang shabu nga motimbang og 20 gramos ug nagkantidad og P136,000, buy-bust money, usa ka cellphone, IDs, motorsiklo ug kwarta nga nagkantidad og P3,000. Sa report sa  PDEA-7 , si Gaviola gipaubos sa usa ka buwan nga case build-up ug nahibaw-an nga maka dispose kini og 30 gramos kada semana.

Sigon sa tigpamaba sa PDEA-7 Leia Alcantara nga ang ilang intelligence officers nakadawat og report nga nalambigit si Gaviola sa ginadiling drugas samtang naglingkod pa kini isip barangay kagawad sa maong barangay.

Tungod sa maong impormasyon naghimo sila og subsob nga pagpaniid sa iyang mga kalihokan ug dihang nakompirmar ang report ayha giplano kun unsaon siya pagdakop.

Nahimong konsehal si Gaviola sa Barangay  Sto. Niño sa wala pa ang Barangay ug Sangguniang Kabataan Elections niadtong buwan sa Oktubre.

Ang mga drug evidence nga nakuha gikan sa dinakpan gisumetir na sa laboratory alang sa chemical analysis ug proper disposition.

Samtang gikatakdang pasakaan og kasong kalapasan sa Sections 5 ug 11, Article II sa Republic Act 9165 ang dinakpan.

Si Kapitan Lourdes Ramirez sa Barangay Santo Niño, nitug-an maoy rason nga wala niya ilakip ang dinakpan sa ilang lineup sa niaging piniliay tungod kay basin unya maapektahan sila.

Dugang pa ni Ramirez nga napositibo sa drug test si Gaviola kaniadto ug duna sab silay confirmatory result bahin niini.

Daan ng nipahibalo ang PDEA-7 niadtong naghinangat pa ang piniliay nga nahitabo niadtong Oktubre 30, 2023 nga dunay mga nikandidato sa nakalabay nga piniliay nga nalambigit sa ilegal nga drugas.

Hinuon, human sa piniliay ang PDEA-7 miingon nga kadtong mga gidudahang nalambigit sa ilegal drugs nga mga kandidato nangaparot tanan. — Rowena Capistrano, IBM (BANATNEWS)