Foundation mobalik sa 8.4 ektarya nga luna ngadto sa Kapitolyo

CEBU, Philippines — Usa ka foundation ang gusto nga ibalik ngadto sa Probinsiya sa Sugbo ang 8.4 ka ektarya nga luna nga wala ma-develop.

Ang Pagtambayayong Foundation Inc. (PFI), usa ka housing foundation alang sa low-income group ang nidesisyon nga ibalik na lang sa Kapitolyo ang wala magamit nga luna diha sa Barangay Kalunasan, Dakbayan sa Sugbo.

Niadtong Disyembre 5, 2023, si Paula Fernandez, executive director sa PFI nipadayag ngadto kang Gobernador Gwendolyn Garcia sa maong desisyon.

Ang maong mga luna ubos sa usa ka joint venture agreement nga gipirmahan atol sa administrasyon ni kanhi gobernador Lito Osmeña nga giila sa administrasyon ni Garcia. Ubos sa maong kasabotan, ang PFI maoy mopalambo sa maong luna nga gipanag-iya sa Kapitolyo nga niabot ngadto sa sobra 24 ka ektarya ang gilapdon.

Ang abot sa maong pagpalambo bahinon sa probinsiya ug sa foundation.

Sa kinatibuk-ang gilapdon sa luna 16.4 ka ektarya lang niini ang napalambo ug nagamit samtang ang nahabilin nga 8.4 ka ektarya ang wala pa magamit.

Atol sa tigom tali sa gobernador, ang PFI nipadayag nga dili na niini mapalambo ang nahabilin nga luna hinungdan nga ibalik nila kini ngadto Kapitolyo.

Ang Kapitolyo maghulat sa formal letter sa PFI pagpadayag sa ilang desisyon nga mo waive sa ilang katungod nga i-develop ang maong mga luna ug ibalik na lang kini sa Kapitolyo. — BDB (BANATNEWS)