Bag-ong opisyales sa TCCCI nanumpa kang Gullas

CEBU, Philippines — Pormal nang nanumpa sa ilang katungdanan ang bag-ong napili nga opisyales sa Talisay City Chamber of Commerce and Industry (TCCCI) niadtong  Martes.

Ang presidente nga si Archie Campo nihulip ni Cyril Velasco kinsa niserbisyo sulod sa duha ka tuig. Si Campo uban sa iyang mga kaubanan ang nanumpa ngadto kang Mayor Gerald Anthony “Samsam” Gullas, Jr..

Si Gullas kinsa nihatag og mensahe ang nipasalig sa iyang suporta.

Nagkanayon si Gullas nga ang mga negosyante mao ang katambayayong sa lokal nga kagamhanan alang sa paglambo sa siyudad.

Gani lakip sa programa ni Gullas mao ang business friendly nga administrasyon.

Nitudlo si Gullas sa iyang sakop nga mao ang sangpiton sa grupo sa mga negosyante sa ilang mga yangu-ngo aron mahatagan usab dayon kini og pagtagad.

Masaligon ang mayor nga maprotektahan ang Talisaynon nga negosyante ngadto sa dautang elemento pinaagi sa pagsuporta nila sa kapolisan.

Gibasehan ni Gullas ang wiper patrol nga mao ang magmotorsiklo nga kapolisan ug mga sakop sa Special Weapon and Tactic.

Sa iyang bahin, si Campo mapasalamaton sa mayor tungod kay tinguha usab nila ang maayo nga relasyon alang sa pagpalambo pa sa ilang mga negosyo.

Ang pagtabang sa ginagmay nga magpapatigayon mao karon ang ilang hagit pinaagi unya sa ilang mga programa nga gipanghan-ay. (BANAT NEWS)