‘Mastermind’ sa Oro Sugbu robbery, pasar sa bar

CEBU, Philippines —  Gipasanginlang mastermind sa Oro Sugbu robbery sa dalan Colon, Cebu City nga si Jigger Geverola, pasado sa 2023 Bar exams.

Si Jigger Capadngan Geverola maoy ika 1,780 sa nakapasar nga 3,812 gikan sa 10,372 ka bar examinees niadtong Septiyembre ning tuiga.

Si Geverola nagtrabaho sa legislative department isip administrative staff ubos sa buhatan ni Board Member Raymond Joseph Calderon 2nd District sa dihang kini giakusahang maoy utok sa maong pagpanulis dul-an duha ka semana na ang nakalabay.

Sa interbyu kaniya sa Banat News diha sa prisohan diin siya na-detain, siya miangkon nga sagol-sagol ang iyang gibati karon pagkasayod nga nakapasar siya sa Bar.

“Una gyud nakong gibati ang di masabot, o gitawag natong ambivalent nga gibati o mixed emotions, nga maglagot nga nakapasar na unta ka pero naay sitwasyon (pagkabilanggo) nga nagpahipi. Pero bisan unsa pa man, pasalamat sa Ginoo, pasalamat sa Kahitas-an, pasalamat sa tanang nagsuporta ug nisanong sa akong kalampusan karon, sa kahitas-an, pamilya, ug sa tanang nag-ampo nga makagawas ko aning akong sitwasyon o sa hadla ning kahigayonan,” matud pa niya.

Sumala pa sa umaabot nga abogado, ang kapalaran sa tawo gikulit ng daan sa Kahitas-an bisan unsa pay mahitabo mao gyud kini ang padulngan.

“Destiny gyud ang tanang butang ning kalibutana. Ang Ginoo naghatag na nato og para asa ta. Kung para gyud ka diha nga maabogado ka, bisan unsa pa na nga pagsulay, unsa pay agianan, padulong gihapon ta diha.,” matud niya. Mao nga ang tambag niya sa mga gustong mag-abogado mao ang determinasyon.

“Ang importante lang nga determindado lang gyud ka ug gamiton nimo tanan nimong nahibaloan, sakripoisyo, pokus ug determination ug pagmapo sa kahitas-an nga lamdagan sa tanang higayon, unsay angay nimong buhaton, unsay angay nimong tun-an pagpasar sa Bar exams,” panapos pa niini. IBM (BANATNEWS)