Mopahugot sa pagbantay

CEBU, Philippines — Tungod sa nahitabong MSU bombing sa Marawi City, gibutang sa heightened alert ang kapolisan sa tibuok nasud  ilabi na dinhi sa Sugbu nunot sa daghang mga kalihokan tungod sa kapaskohan sama sa umaabot nga “Misa de Gallo” sa Disyembre 16, 2023.

“That is the reason why our Chief PNP directed our ground commanders to intensify po iyong ating target hardening including po iyong police presence and visibility natin sa churches lalo't December 16 start na po ng mga Simbang Gabi,” matud pa ni PNP spokesperson Jean Fajardo sa press briefing kagahapon.

Ang Misa de Gallo o Simbang Gabi, usa ka tradisyon sa mga Kristiyanong Katoliko pagpahigayon og siyam ka adlaw nga nobena sa dili pa ang Pasko.

Milyones nga mga Romano Katoliko ang gipaabot nga modagsa sa nagkadaiyang mga simbahan sa tibuok Pilipinas aron pagtambong niini.

Ang pagpamomba didto sa MSU-Marawi gihimo atol sa pagselebrar sa Santos nga Misa sa mga Kristiyanong mga estudyante, mga magtutudlo ug pipila ka mga residente diha sa sud sa campus compound sa maong eskuylahan.

Cebu City

Sa Cebu City Police Office(CCPO), si Police Lieutenant Colonel Janette Rafter, Deputy City Director for Operations miingon nga daan na silang naghigpit sa ilang pagbantay pagsulod palang sa bulan sa Disyembre kay sayod silang modugok gyud ang mga tawo.

Dunay dugang mga polis ang ipadala sa Police Regional Office PRO-7 sa nagkadaiyang dagkong siyudad ug probinsiya sa Central Visayas aron motabang sa pagbantay sa seguridad sa lugar ingon man sa katawhan.

Si CCPO Director Police Colonel Ireneo Dalogdog miawhag sa publiko nga tabangan sila pagbantay ug paghatag og mga impormasyon kun dunay mga kadudahang mga kalihokan diha sa ilang mga lugar.

Si Dalogdog uban ang Joint Task Group Cebu nakigtagbo sa Muslim Community ug sa mga mosunod nga mga adlaw isunod dayon nila ang ubang sector aron hisgutan ang seguridad ug ilang partisipasyon bahin niini.

Lapu-Lapu, Talisay City

Susamang hugot nga pagbantay sab ang gihimo sa siyudad sa Lapu-Lapu City Police Office (LCPO) ug Talisay City Police Station. Si  Police Lieutenant Colonel  Christian Torres, pangulo sa Investigation Detection  and Management Unit (IDMU) ug tigpamaba sa LCPO miingon nga gibantayan ug gipanid-an nila ang mga paabangan sama sa mga  lodging house, motel o hotel alang sa seguridad.

Matud pa ni Torres nga sa pagsugod unya sa Misa de Gallo  sa Disyembre 16 nga magtapok ang mga tawo sa mga simbahan daghang polis ang ipakatap.

Apil sa mga higpitan ang pagbantay ang mga pantalan ug ang mga vital installations nga naglakip sa Marcelo Fernan Bridge ug Mactan Mandaue Bridge.

Samtang si Police Lt. Col. Wayne Magbanua, hepe sa kapolisan sa Syudad sa Talisay miingon nga mas gipalapdan pa nila ang ilang pagsusi sa mga tawo nga mosud sa Talisay.

Pope Francis

Si Pope Francis mipaabot sab sa iyang pahasubo ug misaad nga iampo ang mga biktima sa pagpamomba sa Marawi City. “I wish to assure my prayer for the victims of the attack that occurred this morning in the Philippines, where a bomb exploded during Mass,” matud pa sa pamahayag sa Santo Papa sa X, kanhi Twitter.

“I am close to the families and the people of Mindanao, who have already suffered so much,” dugang pa niya.

Imams ug ulama

Bisan ang mga kapunongan sa mga Imams ug Ulama o mga lider sa Islam sa Pilipinas mihulagway nga supak sa ilang pagtulon-an ang gihimo didto sa MSU-bombing.

“In Islam, the only wars that are permitted are between armies and they should engage on battlefields and engage nobly. The Prophet Muhammad said, ‘Do not kill women or children or non-combatants and do not kill old people or religious people,’ and he mentioned priests, nuns and rabbis,” sumala pa sa pamahayag sa United Imams of the Philippines.

Matud pa nila, ang paghimo og bayolenteng mga lakang sa mga inosenteng sibilyan: “constitutes a form of injustice that cannot be tolerated by Islam, which views them as gross crimes and sinful acts.”

“Any attack on innocent people is unlawful and contrary to Shari'a (Islamic law). Muslims must safeguard the lives, honor and property of civilians and non-combatants. Attacking them contradicts Shari'a,” puno pa nila.

Samtang gikondenar sab sa Simbahang Katoliko ang maong pagatake.

“Surely, the killers who precipitated such a horrendous act of violence have their loved ones too. What would it take to get them to see in the families of their victims their own families?” matud pang CBCP President Bishop Pablo Virgilio David. “Such violence should not only be denounced; it should also be renounced as a way of seeking redress by every peace-loving Filipino,” dugang pa niya.            

Padayon sa pag-ampo

Si Archbishop Jose Palma sa Archdiocese of Cebu nipadangat sa iyang pahasubo ug pag-ampo sa mga biktima sa pagpamomba sa Marawi City nga nikalas og niangol og pipila ka mga tawo.

Matud pa sa Arsobispo walay nagdahom nga mahitabo ang sama niini nga pagatake maong iyang giawhag ang tanan nga padayon ang pagampo alang sa kalinaw sa nasud. — Romeo Limpangog, Gabriel Bonjoc, Rowena Capistrano (BANAT NEWS)