Pagtuki sa bonus sa mga kawani sa City Hall giuswag

CEBU, Philippines — Nabalhin na usab ang katapusang deliberasyon sa P35,000 nga bonus sa mga regular ug kaswal nga empleyado sa Cebu City Hall tungod sa umaabot nga Philippine Councilors League (PCL).

Suma pa ni Konsehal Noel Wenceslao, Chairman sa Committee on Budget and Finance nga ila untang himoon ang final deliberation sa proposed budget niadtong Miyerkules atol sa regular session.

“Nabalik gihapon namo ang endorsement gikan sa executive it’s because nasayop man to, unya ang usa raman gud ang gipirmahan ni Dondon Hontiveros (Acting Mayor), kay during that time siya may acting mayor,” matud ni Wenceslao.

Kaniadto, gikataho usab nga nalangan ang deliberasyon alang sa pag-aprobar sa maong bonus sanglit ang proposal gibalik sa Local Finance Committee nunot sa mga clerical error niini.

Ning higayona, gibalik kini sanglit si Acting Mayor Hontiveros usa lang ka pahina sa proposal ang napirmahan alang sa P35,000 nga bonus ug ingon man ang proposed ordinance sa paghatag og bonus sa mga job order employees sa city hall.

Si Hontiveros maoy acting mayor niadtong tungora kay on leave si Cebu City Vice Mayor Raymond Alvin Garcia.

Sa pagkakaron, gibalik ang proposal aron mapirmahan ni Acting Mayor Garcia ang tanang pahina. Subay niini, karong adlawa (Lunes) o sa Martes, ipahigayon ang special session aron maka duso alang sa pagpahigayon og special budget hearing.

Si Wenceslao niingon nga ilang paminawon ang habig sa Local Finance Committee aron masuta kon duna ba gyod kakuhaan og pundo aron maaprobahan ang mga sugyot.

“So hopefully, dili na karong Miyerkules ang amoang session kay walay session (karong Miyerkules) kay PCL man sila, so next Wednesday na ang final deliberation,” matud ni Wenceslao. — /MEL (BANAT NEWS)