Koleksyon sa night market gigamit sa operasyon suma sa organizer
CEBU, Philippines — Giklaro sa mga organizer sa Cebu City Colon night market nga ang ilang koleksyon nga tag P200 gikan sa mga vendors gigamit sa pagmentinar sa tibuok dapit.
Si Maria Pino, ang organizer sa Colon Night Market niingon nga sa pagkakaron, ang Garbo Asenso Sumbanan Alyansa (GASA) mao ang nagdumala sa night market ug niadtong miaging tuig, ang Cebu City United Vendors Association (CCUVA) maoy nagdumala niini.
Gituki atol sa executive session nga ang mga organizer sa Night Market mangolekta og di mominos P200 sa matag vendor nga niapil nga mosumada sa kinatibuk-ang koleksyon gikan sa P60,000 ngadto sa P80,000 matag adlaw.
Matud ni Pino, nga gikuha gikan sa maong koleksiyon ang pagmentinar sa maong aktibidad sama na lang sa matag gabii nga gastohan alang sa pagkaon sa kapolisan, Barangay Tanod, PROBE, ug uban pang force multipliers nga gipakatap palibot sa night market.
Siya nidugang, nga adunay labing menos 280 ngadto sa 300 ka mga tawo nga ilang pakan-on diin ang pagkaon nagkantidad og P70 matag usa.
Sa kinatibuk-an, mogahin sila og average nga P30,000 matag adlaw alang sa pagkaon.
“Usahay naa pay mga bisita nga maabot sad dinha, sa atong siyudad, pareha sad atong MMDA nga miari diri, so kami sad ang mu cater ani nila,” matud ni Pino.
Gawas niini, P3,000 usab ang ilang gibayad sa electrician matag adlaw. Alang sa pagmonitor sa elektrisidad, kinahanglan silang mobayad sa 68 ka indibidwal diin muhatag sila og honorarium.
Dugang pa ni Pino nga ilang gibayran ang maintenance team nga nagkantidad og labing menos P16,000 ngadto sa P18,000 matag semana.
Alang sa bayronon sa kuryente, si Pino niingon nga mo-average sila og P300,000 hangtod sa P500,000 matag buwan. — /MEL (BANAT NEWS)
- Latest
