Buhatan sa CCENRO gitulis?  

CEBU, Philippines — Samtang nagpadayon pa ang imbestigasyon aron masuta kon aduna bay mga butang nga nangawala sulod sa buhatan sa Cebu City Environment and Natural Resources Office (CCENRO) ilusad usab ang laing imbestigasyon aron pagsuta sa mga lapso sa bahin sa mga security personnel.

Kagahapon sa buntag dihang na-post sa social media ang mga hulagway ug impormasyon nga giingong gitulis ang buhatan sa CCENRO.

Gibutyag ni CCENRO Officer-in-charge Raymar Hijara nga padayon pa ang imbestigasyon sa kapolisan pagsuta kon adunay nawala nga mga butang sa maong buhatan.

Matud ni Hijara nga nadiskubrehan sa pipila ka mga empleyado nga abli na ang lock sa buhatan mga alas 5:00 sa kaadlawon kagahapon.

Ang maong mga empleyado nianha sa nahisgutang buhatan aron mangandam kini sa ilang ipahigayon nga tree-planting activity.

“So far wala pa tay nakita nga naay nawala…. unya ang mga laptop gani diri wala gani gipanguha. Ang duda sa polis ani initially kay kuwang-kuwang ang huna-huna sa galungkab ani”, padayag ni Hijara.

Giangkon ni Hijara nga wala silay closed circuit television (CCTV) camera sa palibot sa opisina diin gitakda sila nga mobalhin ngadto sa satellite office.

Giingong wala ablihi sa pinugos nga paagi ang buhatan ug adunay security personnel nga nagbantay sa entrada sa opisina.

Sa laing bahin, si Cebu City Councilor Philip Zafra, chairman sa Committee on Peace and Order niawhag sa pangulo sa CSU nga mohimo og incident report kalabot sa maong hitabo.

Matud ni Zafra nga sa iyang initial nga kasayuran wala nalungkab ang maong buhatan tungod kay walay force entry ug walay nangawala.

Si Zafra nagkanayon nga angayan usab nga mopagawas ang city administrator sa buhatan ni Mayor Michael Rama kalabot sa pagkamabinantayon sa tanang mga department head diin sigurohon nila sa pagsuta ang ilang mga buhatan kong hingpit na kini nilang nasiguro nga nasiradohan. (BANAT NEWS)