National Retreat for Priest gitak-opan na kagahapon

CEBU, Philippines — Gidayeg ug gipasalamatan sa Spanish priest nga si Padre Pablo Escriva de Romani ang mga layko nga kinasing-kasing nga niserbisyo ug nisuporta sa gihimo nga National Retreat for Priest 2023 nga gipahigayon tulo ka adlaw dinhi sa Dakbayan sa Sugbo.

Ang maong kalihokan gisugdan niadtong Nobiyembre 7, 2023 ug gitak-opan kini kagahapon.

Kauban ni Romani si Sr. Briege Mckenna sa paghatag og retreat sa mga kaparian diin nagkanayon kini nga dako ang iyang katingala sa pakighiusa sa mga layko sa kalihokan sa mga kaparian aron makab-ot sa mga kaparian ang ilang bokasyon.

Matud ni Romani nga ang iyang trabaho kauban si Mckenna mao ang pagpakita sa hulagway ni Hesus nga nagmisyon sa katawhan apan ang kasing-kasing nga nibuhi niini kay ang pakig-alayon sa mga layko.

Ang maong kalihokan kay gitambongan sa 2,183 ka kaparian gikan sa 58 ka mga participating dioceses diin adunay 31 ka arsobispo ug obispo ang niapil usab.

Niabot sa 400 usab ka layko sa Archdiocese of Cebu gikan sa nagkadaiyang mga pundok ang ni-volunteer sa maong kalihokan aron magmabungahon ug malamposon kini.

Ang maong kalihokan gipangulohan kini nila ni Archbishop Jose Palma, D.D ug ang over-all chairman sa NRP 2023 Fe Mantuhac-Barino.

Ang maong kalihokan gitapos kini kagahapon diin pulos pagdayeg ug pasalamat ang giluwatan nga pamahayag sa mga kaparian nga niapil sa kalihokan tungod kay susama ug international retreat ang ilang giapilan ug mapasalamaton sa pagkamaabi-abihon sa mga Sugbuanon.

Ang mga nanambong sa kalihokan gikan sa lain-lain nga dapit ang nipadayag nga hamubo ra ang adlaw pero malipayon sila nga adunay maanindot nga mabitbit nga napupo nga mga pagtulon-an nga ilang madala balik sa ilang tagsa-tagsa ka mga parokya ug mission. BDB (BANATNEWS)