Presyo sa palaliton alang sa Noche Buena nisaka

CEBU, Philippines — Subay sa nagkaduol nga pasko nisaka sa 15 porsyento ngadto sa 20 porsyento ang presyo sa mga Noche Buena products lakip na niini hamon ug spaghetti pasta.

Hinuon aduna pay mga tindahan nga wala pa mopaumento sa ilang presyo.

Usa sa mga supermarket sa Colon sa Dakbayan sa Sugbo ang aduna nay mga display sa nagkadaiyang klase sa hamon diin mingaw pa usab ang palit busa wala pa molihok ang presyo og nagpabilin sa naandan nga presyo.

Ang price range gikan sa P199, P270, P369 pataas diin magdepende kini sa timbang ug brand ug mao gihapon kini ang naandan nga presyo.

Ang uban nga brand nag-buy one take one sa ubos kaayo nga presyo.

Ang Consumer Protection Division Chief sa DTI-7 Ines Cajegas nagkanayon aduna nay paglihok sa presyo sa mga Noche Buena products sama sa ham ug mga sagol sa spaghetti nga naggikan  sa 15 ngadto sa 20 porsyento.

Ang DTI nagpaabot pa hinuon sa price guide nga ipagawas sa ilahang ulohan nga buhatan.

Gipaneguro sa DTI nga adunay igong supply sa mga Noche Buena products.

Ang DTI niawhag sa mga pumapalit sa pagmatngon sa mga palaliton ug kadtong gikinahanglan lang ang paliton.

Ang mga nagdumala sa mga tindahan nibutya nga nilihok gamay ang presyo sa mga salad ingredients ilabi na sa pagpatam-is nga nagsugod P3 ngadto sa P10 depende sa timbang ug brand.