Polis nga nakadisgrasya og motorista gikasohan na

CEBU, Philippines —  Gipasakaan na og kaso ang usa ka polis nga maoy hinungdan sa pagkadisgrasya sa usa ka motorista diha sa Cebu South Coastal Road sa Barangay Dumlog, Dakbayan sa Talisay.

Si Patrolman Erno Kevin Lisondra nag-atubang kini og kasong reckless imprudence resulting to physical injuries and damage to property ug kasong abandonment.

Si Lisondra kinsa nadestino ngadto sa Probinsiya sa Bohol ang lakip sa augmentation force nga gipadala sa Siyudad sa Lapu-Lapu.

Niadtong niaging semana nagmaneho og auto si Lisondra ug paingon unta kini sa amihanan apan sa pag-abot niya diha sa eskina sa lugar nga nahitaboan nikalit kini og U-turn hinungdan nga ang motorsiklo nisampak sa walang bahin sa auto.

Si Lisondra wala mohunong gumikan sa iyang kahadlok nga dumogon sa mga tawo.

Ang biktima mao si Samuel Praxedes Villanueva, hingkod ang panuigon, tinun-an sa medisina, taga Barangay Guizo, Dakbayan sa Mandaue gidala ngadto sa tambalanan.

Ang maong polis nitahan sa iyang kaugalingon sa kapolisan sa Dakbayan sa Talisay pipila ka oras ang nilabay human sa disgrasya. BDB (BANATNEWS)