Mga tawo nga nibisita sa sementeryo nidagsang pagkahapon

CEBU, Philippines — Gibana-banang niabot sa 35,000 ka tawo ang nibisita sa mga lubong sa nitaliwan na nilang mahal sa kinabuhi diha sa upat ka nag-atbang nga sam-ang nga nahimutang sa Barangay Guizo, Siyudad sa Mandaue niadtong Nobiyembre 1, 2023 o adlaw sa mga Santos.

Kini ang gipadayag ni Police Lieutenant Franc Rudolf Oriol, deputy director for administration ug tigpamaba sa Mandaue City Police Office (MCPO) nga nahinabi sa mga tigbalita.

Matud ni Oriol nga ilang namatikdan ang pagdagsang sa daghang mga tawo niana nang hapon hangtud sa gabii tungod kay wala nay init.

Nunot sa maong pagdagsang sa mga tawo nga mosulod sa maong mga sam-ang padayon usab ang hugot nga pagbantay sa 300 ka sakop sa kapolisan sa MCPO, Bureau of Fire Protection (BFP), mga volunteer ug mga traffic enforcer sa Traffic Enforcement Agency of Mandaue (TEAM)  nga nagpatuman sa kahapsay sa dagan sa mga sakyanan.

Nasayran nga sukad sa adlaw sa mga Santos sa Nobyimbre 1, 2023 hangtud sa adlaw sa mga kalag kagahapon wala  sila makatala og daotang panghitabo diin sa kinatibuk-an malinawon ug hapsay ang maong duha ka adlaw nga pagsaulog sa dlaw sa mga Santos ug kalag.

Matud usab ni Oriol nga ang ilang police assistance desk nga gipahimutang sa matag sam-ang ang adunay gidestino nga sakop sa kapolisan nga mahimong kadangpan   sa mga tawo nga nakasinati og mga kakuliamn sa ilang pagbisita sa sam-ang.

Ang upat ka mga sam-ang nga nahimutang sa Barangay Guizo ang gidumala sa kaparian sa Saint Joseph Catholic Church, municipal cemetery nga gidumala sa kagamhanan ug nahimutang usab sa atbang nga bahin ang duha ka pribadong sam-ang.  (BANAT NEWS)