Lechon ug mga prutas kusog ang halin sa menteryo sa Talisay

CEBU, Philippines — Gawas sa kandila ug buwak kusog sab ang halin sa lechon ug mga prutas nga naa gawas sa mga sementeryo sa Dakbayan sa Talisay.

Si Erica Lyn Enriquez nagkanayon nga labing una nila kini nga namaligya og lechon sa adlaw sa kalag ug santos.

Mga alas 11 sa buntag nakahurot na sila og tulo ka lechon diha sa sam-ang sa Barangay Cansojong ug Tanke.

Halin sab kaayo ang fried chicken, popcorn ug mga mainum.

Naa sab ang nagkalain-laing prutas nga pangdad-on sa mga tawo sulod sa mga sam-ang. Ang 15 anyos nga batang babaye nidalit og hotdog, pancit canton ug pritong saging sa iyang 2 anyos nga igsuon nga namatay na.

Matud pa ni Almira Ambohot nga usa kini ka paagi nga mapakita ang iyang gugma ug kamingaw sa iyang manghud nga namatay sa sakit sa kasing-kasing.

Taliwa sa pagdagsa sa katawhan way nahitabo nga kaguliyang ug hapsay ug malinawon ra segun sa monitoring sa kapolisan sa Dakbayan sa Talisay. (BANAT NEWS)