Upat di maproklamar tungod sa kaso
CEBU, Philippines — Dunay dili maproklamar nga upat ka mga kandidato sa Barangay ug Sangguniang Kabataan Elections 2023 sa Central Visayas kun pananglitan modaog sila sa piniliay kagahapon.
Nagkanayon si Atty. Lionel Marco Castillano, Regional Director sa Commission on Elections (COMELEC) -7, nga ang COMELEC en banc nipagawas og suspension of proclamation order batok sa nigadan pagka SK Kagawad sa Barangay Buanoy, Lungsod sa Balamban; nidagan pagka kapitan sa Barangay Valladolid sa Dakbayan sa Carcar; Barangay Maguikay sa Dakbayan sa Mandaue ug Barangay Cancawas, Lungsod sa San Jose sa Probinisya sa Negros Oriental.
Ang mga naasoy nga mga kandidato dunay pending nga kaso sa buhatan sa Commission on Elections sama sa disqualification case.
Sa pangutana kun unsay mahitabo kun pananglitan ang dunay kaso ang modaog sa piniliay, si Castillano miingon nga maghuwat sila nga malibkas ang suspensyon.
“Huwat lang og naay order to lift suspension order para ma proclaim sila. Dili pwede ang no. 2 i- proclaim kay wala man sila na-disqualified,” sigon ni Castillano.
Nunot sa maong nitabo, nipagawas og direktiba si Castillano sa mga election officers ug provincial election supervisors sa mga naasoy nga mga dapit nga magpadala og dugang pwersa kun himuon na ang proklamasyon aron malikayan ang kagubot ilabi na sa mga supporters.
Gipasabot ni Castillano nga wala’y problema sa mga kandidato tungod kay na-serve naman nila ang order of suspension sa nakalabay nga adlaw apan gitan-aw nila ang mga supporters nga basin dili madawat ang resulta mohimo na hinoon kasamok. (BANAT NEWS)
- Latest
