Nasugba sa ulingan

CEBU, Philippines —  Patay ang usa ka 68- anyos nga lalaki human kini aksidenteng natagak sa iyahang gihimong ulingan kagahapon sa buntag Oktubre 26, 2023 sa Purok Nangka, Barangay Kayam, San Remigio.

Ang biktima giila sa mga silingan nga si Rodolfo Castillo Baril, residente sa maong dapit, gituohang hubog kini atol sa pagkahitabo.

Matud pa ni Police Major Windell P. Abellana, hepe sa San Remegio Police Station sa wala pa kini nahitabo sa sayo pa, nakit-an ang biktima nga nag-inom og ilimnong makahubog.

Apan sunod nga pagkakita kaniya, nasugba na ang katunga sa lawas niini gikan sa lapa-lapa hangtud sa bugan sa iyang ulingan nga adtong tungora nagbaga.

Gisuwayan pa unta kining tabang sa mga residente  pinaagi sa pagbira kaniya pagawas sa lungag sa ulingan apan tungod sa kainit nangayo sila og tabang sa Emergency Medical Services sa San Remigio apan pagabot sa mga personnel emergency medical service wala na kinabuhi.

Nakaangkon og grabeng kadaut sa mga tiil kay nangapaig ug nangaputol ang mga lapa-lapa hangtud sa ubos nga bahin sa tuhod nga maoy gituohang nakaingon sa kamatayon niini.

Gitambagan sa kapolisan ang kabanay nga ipaubos sa autopsy ang patay’ng lawas apan mibalibad tungod kay nagtuo sila nga aksidente gyud ang pagkahagbong niini ngadto sa iyang ulingan nga maoy hinungdan sa iyang kamatayon.— IBM (BANATNEWS)