Chinese nationals nga “mikulata,”  nakapatay sa Nigerian, gikasohan

CEBU, Philippines —  Napasang-at na sa kapulisan sa Dakbayan sa Mandaue ang kasong murder ug human trafficking batok sa unom ka mga Chinese nationals kinsa giingong maoy suspetsado sa kamatayon sa usa ka Nigerian national nga  gikulata ayha nila gi-turn over sa Police Station 1 niadtong adlaw nga Sabado.

Ang Nigerian kalit nawad-an og panimuot maong gidala kini sa tambalanan pana nakabsan gyud gihapon sa kinabuhi.

Matud pa ni Police Lt. Col. Franc Rudolf Oriol, Deputy City Director for Operations ug tigpamaba sa MCPO, Martes, kagahapon sa buntag gi- file na nila ang kaso batok sa mga suspetsado.

Gi-otopsiya na sab ang Nigerian human mitugot ang pamilya pinaagi sa Nigerian Embassy.

Ang mga Chinese nationals nga giingong amo sa biktima nag-abang og apartment sa Alang-Alang,  Mandaue City ug stay-in ang Nigerian ug uban pang empleyado niini sa iyang online crypto currency business.

Nagtuo ang kapolisan nga naa pa sa Sugbo ang mga suspetsado, nakig-alayon na usab sila sa Bureau of Immigration aron dili kini sila makabiyahe o makagawas sa Pilipinas.

Gibutyag ni Oriol, naka identify na sila sa upat ka mga suspetsado ug padayon pa nilang giila ang laing duha ka John Does mao nga naduso na nila ang kaso pinaagi sa regular filing, warrant of arrest nalang ang ilang gipaabot aron sila dakpon.

Base sa imbestigasyon sa kapulisan, ang 29-anyos nga biktima kapin usa ka tuig dinhi sa Sugbu.

Ang mga kauban sa namatay na rescue na sa kapulisan samtang giingong dunay laing Nigerian ug Pilipino nga gipangita sa kapolisan.

Dugang sa kasong gipasaka ang human trafficking kay giingong gidala ang biktima ug mga kauban niini nga walay klarong mga dokumento, adunay pagpangabuso sa trabaho, walay klarong sweldo, tag-as usab kaayo nga oras sa trabaho.

Niadtong adlaw nga Sabado ang biktima giingong gidala og mga Chinese nationals nga babaye ug lalaki, sa Police Station 1 kay gipasanginlan nila kining nang-molestiya og kauban nilang babayeng Chinese.

Apan sa pagsusi sa kapulisan giingong mi-absent ang biktima sa trabaho maong nagkalalis sila sa agalon, apan gitabangan hinuon og kulata.

Si Oriol nitug-an sa dihang ni collapsed ang biktima sulod sa police station, dali-daling mieskapo ang babaye ug lalaking Chinese nationals samtang gitabang aron madala sa tambalanan ang ilang gidala. Gibutyag ni Oriol miingon nga ilaha susihon kun dunay lapso ang imbestigador o mga sakop sa Station 1 sa nahitabo.  IBM (BANATNEWS)