Konseho sa Cebu City niawhag sa PNP, AFP hugtan ang seguridad

CEBU, Philippines —  Ang konseho sa Siyudad sa Sugbo nipalabang og resolusyon nga nagpahinumdom sa kapolisan sa pag-deploy  sa ilang mga personnel diha sa  kadalanan ingon man ang regular nga pag-roving sa ilang mga hurisdiksiyon aron masiguro nga mamentinar ang  kahapsay ug kalinaw sa dakbayan.

Gikinahanglan usab nga high alert ang Armed Forces of the Philippines Central Command aron dili basta-basta makasulod sa atong dapit ang mga terorista.

Si Konsehal Rey Gealon ang nangamahan sa maong resolusyon nipadayag nga makapabalaka kaayo ang kahimtang sa laing nasud nga nakasinati og kagubot ilabina didto sa Israel diin liboan na ang nangamatay ug nangaangol.

Gihangyo usab sa kagamhanan sa Dakbayan sa Sugbo ang Coast Guard District Central Visayas nga kanunay nga mag-roving diha sa kadagatan ug panid-an kun adunay kadudahan nga mga barko.

“What better way to take caution than for our authorities to undertake extraordinary security efforts and measures, aligned with their respective mandates, in the light of recent events and developments around the world”, pamahayag ni  Gealon nga gipadala niya sa Banat News.Giawhag niya ang publiko nga kanunay’ng magmatngon ug itaho sa otoridad kun adunay mabantayan nga kadudahan nga mga tawo.

“All of us would just have to be careful with lawless elements who may be perhaps lurking in our communities and be vigilant enough to report to the authorities any suspicious activity they may encounter. Those in the uniformed service already know what is best to be done under the circumstances”, dugang ni Gealon. — Rowen D. Capistrano, BDB (BANATNEWS)