Fish pond sa Santo Niño Village ipatangtang

CEBU, Philippines —  Gitinguha karon sa kagamhanan sa Siyudad sa Mandaue nga matangtang na ang fish pond sa wet land nga bahin sa Santo Nino Village nga nahimutang sa habig sa Barangay Banilad sa Siyudad sa  Mandaue.

Kini tungod kay usa kini sa gituohang hinungdan sa pagpundo sa tubig nga moresulta sa mga pagbaha sa maong dapit.

Sa nasayran nga maong dapit nga dunay bakanting luna ang gihimong buhianan og mga isda sa pipila ka molopyo nga maoy gigamit alang sa acquarium.

Si Mandaue City Mayor Jonas Cortes ang naningkamot karon alang sa paghatag og kasulbaran sa problema sa pagbaha sa siyudad.

Sa gihimong press conference gipadayag ni Architect Marlo Ocleasa, pangulo sa City Planning and Development Office nga padayon ang ilang pagpang limpiyo sa kanal pinaagi sa paghabwa sa lapok nga nakabara sa pagdagayday sa tubig.

Nagpadayon na usab sa ilang kalihokan ang giumol ni Mayor Cortes nga Task Force Apas (Atong Problema, Atong Sulbaron) nga maoy gitahasan sa pagtan-aw sa mga angayan ipatuman sa tuyo nga hingpit nga kahatagan og kasulbaran ang problema sa baha nunot usab sa nagpadayon nga drainage maintenance.

Lakip sa mga kanal nga gilimpiyohan mao ang nahimutang sa dalan C. Ouano St. ug A.C Cortes sa Barangay Looc, sa dan M. Ceniza sa Barangay Casuntingan, Zone Ube sa Barangay Paknaan, sa dan E. Espina sa Barangay Banilad, sa Mango Green Subd. Banilad ug uban pa. — MEL (BANATNEWS)