60 ka armas gi-turn over sa Waterfront Police Station

CEBU, Philippines — Gi-turnover niadtong Martes ngadto sa Waterfront Police Station 3 sa Cebu City Police Office (CCPO) ang 60 ka armas nga gibilin sa opisina sa usa ka security agency nga dili na aktibo nga nahimutang diha sa Pier 1, Barangay San Roque, Siyudad sa Sugbo.

Ang maong 60 ka armas gilangkuban kini sa 15 ka shot gun, unom ka caliber .22 ug 39 ka kalibre .38 revolver.  Si Police Lieutenant Colonel Albert Reeves Quilitorio, public information officer sa CCPO nagkanayon ang maong security agency niabang og kwarto diha sa nahisgutang lugar diin gihimo nila kining opisina.

Apan taud-taod na kini nga wala na nag-operate ug gamiton na sa tag-iya ang kwarto hinungdan nga nagpadala kini og suwat sa nagdumala sa security agency aron ipakuha ang mga nahibiling gamit.

Dihang gipa-repair sa tag-iya ang opisina nakit-an ang 60 ka nahisgutang armas hinungdan nga gitawagan nila ang police station ug ilang gi-turnover.

Giklaro ni Quilitorio nga pwedeng  i-claim sa security agency ang mga armas apan kinahanglan nga makapakita kini og dokumento nga magpamatuod nga sila ang tag-iya sa mga armas ug lisensiya.

Ang nahisgutang mga armas i-safe keep una kini diha sa Waterfront Police Station 3.

Sa laing bahin, gihingusgan sa kapolisan sa Lungsod sa Cordova ang pagpasiugda  og Operation Oplan Bakal subay sa Comelec checkpoint.

Si Police Major Michael Gingoyon nagkanayon nga ang mao nilang operasyon alang kini sa malinawon, hapsay ug luwas nga pagpahigayon sa Barangay ug Sangguniang Kabataan Elections (BSKE) sa Oktubre 30, 2023.

Matud ni Gingoyon nga ang gihingusgan nila nga Operation Bakal Sita, checkpoint ug police visibility ilang gitumong sa pagpugong sa mga daotang elemento nga mohimo og krimen.  

Ubos sa Comelec gun ban lakip sa gidili mao ang pagdala og armas gawas sa panimalay bisan kun aduna pa kini lisensiya sanglit nagkinahangan pa kini og exemption pinaagi sa huptan nga special permit. — Romeo T. Limpangog, BDB (BANATNEWS)