Mga establisamento duol sa tunghaan gipa-monitor

CEBU, Philippines — Ang Cebu City Business Permit and Licensing Office gimandoan sa pag-monitor sa mga balay patigayon duol sa mga tunghaan sa siyudad sa pagsiguro nga wala kini sila maninda og ilimnon nga makahubog kini pinaagi sa resolusyon nga giduso ni Konsehal Rey Gealon.

Si Gealon, niduso sa maong resolusyon human ang Business Permit and Licensing Office sa Dakbayan sa Mandaue uban sa Mandaue City Police Office nakakita og unom ka establisamento diha duol sa tunghaan nga naninda og ilimnon nga makahubog niadtong Septiyembre 29, 2023.

Matud ni Gealon nga ang Cebu City Ordinance No.1413 o  Liquor Licensing Ordinance  nag-ban sa tanang bars, beerhouse ug karaoke lounges nga anaa sa 100-meter radius gikan sa tunghaan ug simbahan sa pagtinda og ilimnon nga makahubog.

Ug gumikan sa maong ordinansa importante nga masiguro nga walay ilimnon nga ibaligya ilabi na sa mga menor de edad kinsa mopadalong ug gikan sa tunghaan.

Si Gealon nagkanayon nga adunay panginahanglanon sa Cebu City Business Permit and Licensing Office sa pagdayon nga pag-monitor sa mga business establishment palibot sa tunghaan sa siyudad nga wala sila maninda ug ilimnon nga makahubog.

Gibutyag ni Gealon nga ang mga store owner warning-ngan sa ilang kalapasan nga nahimo ug kong dili sila maminaw sa warning ipahamtang ang suspension sa ilang lisensiya sa pagpamaligya og liquor ug alcoholic beverages.

Apan kong magpadayon pa gihapon sa ilang kalapasan ipahamtang na ang revocation sa ilang lisensiya ug dili na sila mahimo nga makatinda.

Si Gealon nimando sa Office of the Sangguniang Panglunsod secretariat nga mohatag sa resolusyon ngadto sa Cebu City Business Permit and Licensing Office alang sa ilang guidance.  (BANAT NEWS)