Buwaran sa Kinalumsan hugaw ug kuyaw sa panglawas

CEBU, Philippines — Nameligro ang panglawas sa mga residente palibot sa bularanan og isda diha sa sapa sa Kinalumsan taliwala sa Duljo Fatima ug Mambaling kun sila mismong mga nagpuyo sa lugar dili magpakabana ug magpabiling hugawan.

Kini tungod sa nakitang mga basura nga nagtipun-og sa palibot sa buwaranan ug wala gyuy nagpakabana sa paghipos niini, bisan kadtong mga namuwad og isda sa maong lugar.

Nakit-an ang maong hugaw kaayong lugar sa mga sakop sa Coastal Management Board ug Sugbo Bike Lanes Board. Ang grupo gikatakdang molusad og cleanup drive sa maong dapit.

Sumala pang SBLB’s Executive Director Bernard Maraasin sa The Freeman, igsuong pamantalaan sa Banat News, natawag ang ilang atensyon bahin niini tungod sa post sa netizen sa social media page ning pamantalaan nga nagpakita sa tone-toneladang mga basuran diha mismo sa tugkaran sa buwaranan og isda.

Matud pa ang buwaran gyud unta maoy gusting ipakita sa sa hulagway, apan natabunan kini sa mas lapad nga talan-awong nagtipun-og nga basura nga wala gyud panumbalinga o hatagi og pagtagad sa mga nanghimo og buwad sa lugar ug hasta sab sa mga residente nga nagmuyo palibot niini.

Ang maong hulagway nakuha usa ka adlaw human sa city-wide clean-up dili palang dugay. Nga ang gipasabot, bisan sa maong lapad nga cleanup drive, walay milingi o milihok sa maong mga residente palibot sa buwaranan.

Hinuon giklaro ni Maarin, ang mga basura dili tanan gikan sa mga residente tungod kay ang uban niini gikan sa ibabaw nga bahin sa sapa nga gianod ug nabara sa maong dapit.

Apan mabasol sab ang mga opisyales sa maong mga barangay kay dili regular ang pagkolekta sa basura basi kin isa nadawat nga impormasyon ni Maraasin. Tungod niini, napugos ang mga residente nga itambak ilang hugaw ug basura diha sa ilang lugar.

“Grabe gyud…grabe ka daghan sa basura didtong lugara…After namo na survey ang area pag Wednesday, naka decide kog sugdan na dayon namo pag Saturday…pero wa pa gyud mi nahuman..Pirting daghana gyud,” dugang pang Maraasin.

“Naay daghang buwad didto..Buwaran, tapad sa basura..Ngil-ara gyud,”paghulagway pa niya.

“Naay mga nagbuwad, among gipatawag, mong giingnan, di gani mo moduol diha amo ning e demolish ning buwaran,” dugang pa ni Maraasin nga miingon nga dunay mga taga City Health Department nga nikuyog kanila nga miingon nga hugaw gyud ug dili mayo sa panglawas ang maong buwaranan. — /IBM (BANAT NEWS)